Македонската женска кадетска репрезентација е на само еден чекор до светскиот врв! Нашите млади ракометарки обезбедија пласман во големото финале на Светското првенство во училишен ракомет, кое се одржува во Скопје, откако во полуфиналната пресметка ја совладаа селекцијата на Турција со убедливи 30-22.
Салата „Македонско Сонце“ беше сведок на уште една храбра партија на избраничките на Даниела Новска Вељановска, кои покажаа карактер и квалитет кога беше најпотребно.
Решавачка доминација во вториот дел
Натпреварот започна со голема борба на двете страни. Турција пружи силен отпор во првите 30 минути, кои поминаа во израмнета игра гол за гол, па на пауза се замина со нерешени 12-12.
Сепак, во второто полувреме на теренот постоеше само еден тим. Македонските кадетки заиграа многу поцврсто во одбраната и поефикасно во нападот, постепено ја зголемуваа предноста и на крајот заслужено славеа со високи осум голови разлика.
Екс-ју финале: Македонија против Хрватска за златото!
Во битката за најсјајното одличје, Македонија ќе се соочи со репрезентацијата на Хрватска. Хрватките го потврдија својот квалитет во второто полуфинале каде беа поуспешни од Романија, па нè очекува возбудлив балкански дуел за светската титула.
