Какво драматично неделно попладне на италијанските терени! На само 90 минути до крајот на сезоната, битката за пласман во Лигата на шампионите го достигна својот апсолутен зовриен врв. Додека „вечниот град“ преживеа крваво дерби со масовна тепачка и црвени картони, во Торино одекна невиден фудбалски земјотрес кој го фрли гигантот Јувентус на колена.
Од друга страна, бајката на Комо продолжува со полн интензитет, а Милан успеа да преживеа вистински линч на жешкото гостување кај Џенова. Во продолжение, погледнете го комплетниот преглед на натпреварите кои целосно ја прекроија табелата во Серија А.
„Двојниот“ Манчини го реши бруталното Римско дерби исполнето со крв и црвени картони!
Големото дерби на престолнината „Дела Капитале“ донесе сè она што го карактеризира италијанскиот фудбал: огромна тактичка тензија, пеколна атмосфера и брутална тепачка на теренот во која Рома го совлада лутиот ривал Лацио со 2-0 и направи џиновски чекор кон Лигата на шампионите. Херој на денот за „волчицата“ беше дефанзивецот Џанлука Манчини, кој ги постигна двата погодоци.
Самиот натпревар се одигра во необичен термин, напладне во 12:00 часот, поради безбедносни мерки и преклопување со тенискиот мастерс во Рим. Лацио, дополнително уморен од поразот во финалето на Купот од Интер, мораше да дебитира со својот трет голман Фурлането поради повредите на Проведел и Закањи. Рома го скрши отпорот на противникот во финишот на првиот дел кога Манчини најдобро се снајде во гужвата по корнерот на Писили и со глава погоди за 1-0.
Во второто полувреме, тензијата на теренот комплетно експлодираше. По уште еден перфектен прекин, овојпат изведен од Пауло Дибала, Манчини повторно скокна највисоко и зголеми на 2-0. Веднаш по голот, на теренот изби масовна физичка пресметка меѓу фудбалерите на двете екипи, во која судијата мораше да покаже два директни црвени картони – по еден за Ровела кај Лацио и Весли кај Рома. До крајот на мечот, за Рома по четири месеци пауза се врати и Артем Довбик кој ја погоди стативата, запечатувајќи го големиот триумф.
Фиорентина го замолкна Торино: Спалети и Јувентус пред невозможна мисија за ЛШ!
Вистински шок и тотално неверување владее на „Алијанц стадионот“ во Торино. Фиорентина комплетно го надигра и го совлада Јувентус со 2-0 на негов терен, оставајќи ги „бјанконерите“ на катастрофалното шестто место на табелата на само едно коло пред крајот на шампионатот во Серија А.
Тимот предводен од Лучијано Спалети одигра очаен, бавен и безидеен натпревар, а казната за тоа пристигна уште во првото полувреме. Чер Ндур максимално ја искористи одличната асистенција на Манор Соломон и со прецизен удар од непосредна близина го совлада немоќниот Ди Грегорио за шокантно водство на Тосканците.
Јувентус се обиде да нападне и да направи целосен притисок во второто полувреме, но тогаш влезе во вистински ВАР-кошмар. Најпрво, на Вестон МекКени му беше поништен погодок со глава поради претходен фаул врз Робин Госенс, а само неколку минути подоцна и голот на Душан Влаховиќ во празната мрежа беше избришан по видео-проверка поради очигледен офсајд.
Точка на мизеријата на домаќините стави нивниот поранешен фудбалер Роландо Мандрагора, кој со вистински еврогол од далечина ја погоди самата пајажина за конечни 2-0, со што го донесе Јуве во позиција да му треба вистинско чудо за пласман во ЛШ.
Милан преживеа пекол кај Џенова во натпревар прекинат поради паричка од трибините
Екипата на Милан оствари исклучително важна победа на жешкото гостување кај Џенова со 2-1, правејќи огромен чекор напред кон зачувување на своето место кое води во најелитното европско друштво. Овој дуел донесе огромна тензија како на теренот, така и на трибините на стадионот „Луиџи Ферарис“.
„Росонерите“, кои беа ослабени поради суспензиите на Леао и Еступињан, успеаја да поведат на почетокот на второто полувреме кога Кристофер Нкунку изнуди пенал, а потоа самиот ладнокрвно го реализираше за 1-0. Веднаш по голот, натпреварот беше во прекин неколку минути бидејќи помошниот судија беше погоден со паричка фрлена од трибините од револтираните домашни фанови.
Милан успеа да го дуплира водството преку Закари Атекаме, кој со силен удар од работ на шеснаесетникот погоди по асистенцијата на Кристијан Пулишиќ. Иако Џенова експресно се врати во игра со голот на Јохан Васкез по една збрка во одбраната, Милан со неколку спектакуларни одбрани на Мајк Мењан во судиското продолжение успеа да ги одбрани трите златни бода.
Морено го држи сонот жив: Комо го прескокна Јувентус и сонува за историја!
Тимот на Комо продолжува да ја пишува својата фудбалска бајка оваа сезона под водство на Цеск Фабрегас. На домашен терен, Комо успеа да извојува минимална, но бесценета победа над Парма со 1-0, со која успеа да избие на петтата позиција на табелата, веднаш над гигантот Јувентус.
Домаќините комплетно доминираа во поседот на топката и беа тимот који постојано го диктираше темпото, но немаа среќа во првиот дел кога нивниот најдобар стрелец Анастасиос Дувикас ја погоди рамката од голот. Притисокот на Комо продолжи и во второто полувреме, а клучниот момент се случи кога Мартин Батурина изведе слободен удар и ја погоди стативата, а на одбиената топка налета искусниот Алберто Морено кој со прекрасен фелширан удар во далечниот агол донесе водство од 1-0.
Парма успеа да израмни во финишот по еден прекин преку Матео Пелегрини, но тој погодок експресно беше поништен поради офсајд. Во самите завршни минути, Алваро Мората пропушти зицер сам пред противничкиот голман да стави точка на мечот, но и покрај тоа, Комо ги задржа трите бода и на само едно коло до крајот заостанува само два бода зад местото кое води во Лигата на шампионите.
