Фудбалерите на Наполи продолжуваат со одличната форма под водство на Антонио Конте, додека актуелниот шампион Интер влегува во резултатска криза по контроверзното реми против Аталанта.
Политино го прекина постот, Де Брујне и Мектоминеј донесоа пресврт
Наполи изгледаше како заспан џин во првиот дел против Лече, особено по шокантниот гол на Зиберт по само две минути игра. Но, ако првото полувреме му припадна на гостинот, второто беше чиста демонстрација на моќта на клупата на Наполи.
Антонио Конте не чекаше ниту секунда и веднаш по паузата во игра ги внесе Кевин де Брујне и Скот Мектоминеј. Оваа одлука експресно ги „запали“ навивачите на „Марадона“. Веќе во првиот сериозен напад по рестартот, Расмус Хојлунд беше најснаодлив во шеснаесетникот и го најави пресвртот.
Најголемите овации сепак беа наменети за Матео Политино. Човекот кој речиси една година не знаеше за гол, го избра најдобриот момент за да го прекине својот „црн пост“. Со хируршки прецизен удар во 67. минута, Политино не само што ја донесе третата победа по ред, туку и покажа дека Наполи полека го добива шампионскиот менталитет.
Киву бесен на судиите, Интер повторно киксна
Додека во Неапол се славеше, во Милано „летаа“ искри. Интер имаше сè под контрола по голот на младиот Пио Еспозито, кој уште еднаш докажа дека е иднината на италијанскиот фудбал. Но, тимот на Кристијан Киву не успеа да го зададе завршниот удар, а тоа сурово беше казнето.
Аталанта, која неделава доживеа дебакл во Лигата на шампионите, покажа неверојатна жилавост. Израмнувачкиот гол на Крстовиќ во 82. минута предизвика вистинска бура. Целата клупа на Интер скокна сметајќи дека Думфрис бил фаулиран на почетокот на акцијата, а најгласен беше самиот Киву, за што веднаш беше испратен во соблекувалната.
До крајот, „Нероаѕурите“ се чувствуваа оштетени и за недосуден пенал над Фратези, но бодовите веќе беа испуштени. Интер полека ја губи предноста на врвот, а притисокот врз новиот стручен штаб станува сè поголем.
