Сонот за „Грен-слем“ (победа на сите четири скокалници) за Словенецот Домен Превц заврши денеска во Инсбрук. На култната скокалница „Бергизел“, изненадувањето го приреди јапонскиот скокач Рен Никаидо, кој стигна до својата прва победа во кариерата во Светскиот куп!
Во драматична завршница, Никаидо славеше со само 0,5 поени предност пред Превц, спречувајќи го Словенецот да го продолжи победничкиот низ по триумфите во Оберстдорф и Гармиш-Партенкирхен.
Драма на „Бергизел“
Никаидо беше константен со скокови од 131 и 128 метри (276,5 поени), што беше доволно за тесна победа. Домен Превц, кој вчера едвај се квалификуваше како 30-ти, денеска покажа шампионски карактер. Тој успеа да се искачи од четвртото место по првата серија на второто место на крајот, но „Златниот орел“ ќе мора да го потврди во Бишофсхофен.
Третото место му припадна на домашниот миленик Штефан Ембахер, кој задоцни само 0,7 поени зад победникот, комплетирајќи го лудиот подиум во Австрија.
Превц е пред титула
И покрај тоа што не победи денеска, Домен Превц е многу блиску до севкупниот триумф на турнејата. Пред последната станица, тој има огромна предност од 41,4 поени пред второпласираниот Јан Херл.
„Рано е да се зборува за ‘Златниот орел’. Има уште два скока, ќе биде тешка борба до крајот“, изјави скромниот Превц, кој може да стане третиот Словенец во историјата (по Примож Петерка и брат му Петер Превц) што ќе ја освои престижната турнеја.
Финалето е закажано за 6 јануари во Бишофсхофен.
