Фудбалот знае да биде неверојатно суров спорт, а тоа на своја кожа најдобро го почувствуваа фудбалерите на Панама. Во нивниот воведен натпревар од Групата Л одигран во Торонто, тие одиграа машки, храбро и целосно парираа на четирикратниот африкански шампион Гана, но останаа без својот прв историски бод на Светските првенства поради примен гол во последните секунди од мечот.
Иако натпреварот не изобилуваше со премногу шанси и се чинеше дека ќе заврши без голови, Гана успеа да зададе фатален удар во 95-та минута. Брендон Томас-Асанте незапирливо проби по левата страна, брилијантно го помина својот чувар и испрати повратна топка во срцето на шеснаесеттникот, каде Калеб Јиренки се најде на вистинското место и рутински ја смести топката во мрежата за конечни 1-0. Ова е досега најдоцниот победнички гол постигнат на овогодинешниот Мундијал.
Пропуштени шанси и голмански проблеми за Кеироз
Овој резултат е исклучително суров за Панама, која покажа одлична игра во својот четврти мундијалски настап по дебито во 2018 година. Тие беа многу блиску до водство уште во втората минута, но одличниот удар на Сесилио Вотерман со крајни напори беше одбранет од првиот голман на Гана, Лоренс Ати Зиги.
Во второто полувреме, Панама продолжи да се заканува, а Кристијан Мартинез од само неколку метри биеше силно, но ја погоди само надворешната мрежа. Вистинска драма се случуваше пред самиот крај кога и панамскиот голман Орландо Москера замина во противничкиот шеснаесетник при еден прекин, успеа да ја спушти топката со глава до Исмаел Дијаз, но неговиот обид заврши право во рацете на Бенџамин Асаре.
Интересно е што Асаре е вториот голман на Гана, кој мораше непланирано да влезе во игра на полувремето. Искусниот селектор Карлос Кеироз беше принуден на оваа замена откако првиот чувар на мрежата, Ати Зиги, доживеа повреда по незгодно доскокнување во првиот дел.
Скандалот со Партеј и тешкиот распоред што следува
И покрај победата, играта на Гана беше бледа, стегната и далеку од убедлива. Кеироз ќе мора сериозно да ги поправи работите доколку сака позитивен резултат на следниот натпревар против моќната Англија во Бостон.
Дополнителен проблем за африканската селекција е отсуството на нивната најголема ѕвезда во средниот ред, Томас Партеј. На фудбалерот на Виљареал му беше забранет влез во Канада поради тековните кривични постапки кои се водат против него во Велика Британија, што сериозно го наруши балансот во тимот.
Од друга страна, разочараната Панама ќе се обиде да ја прекине својата црна серија на порази на Светските првенства во среда, кога во Торонто ќе се соочи со ранетиот балкански лав – селекцијата на Хрватска.
