Милан продолжува со победничкиот ритам во Серија А, откако вечерва на домашен терен минимално го совлада тимот на Лече со 1-0. Човек на одлука беше зимското засилување Никлас Филкруг, кој со својот прв гол во дресот на „росонерите“ ја круниса тешката опсада на противничкиот гол.
Целосна доминација и „ѕидот“ Фалконе
Милан доминираше во текот на целиот натпревар, но голманот на Лече, Владимиро Фалконе, правеше вистински чуда меѓу стативите. Кристијан Пулишиќ, Рафаел Леао и Адриен Рабио пропуштија серија изгледни шанси, а Фалконе во неколку наврати со нестварни рефлекси ги спасуваше гостите од дебакл.
Тренерот на Милан реши да ги одмори Модриќ и Фофана, но кога стана јасно дека на тимот му е потребна свежа крв во нападот, го внесе во игра искусниот германски центарфор.
Три минути беа доволни за Филкруг
Најважниот момент на натпреварот се случи во 76-та минута. Габија испрати долга топка до Салемакерс, кој одлично нафрли во шеснаесеттникот, а таму Никлас Филкруг, по само три минути поминати на теренот, со прецизен удар со глава ја смести топката во мрежата за голема радост на трибините.
Ова е прв погодок за поранешниот напаѓач на Вест Хем во новиот дрес по неговиот јануарски трансфер, потврдувајќи дека Милан добил вистинска „деветка“ која знае да ги решава тешките натпревари. Со оваа победа, Милан дополнително го зацврсти второто место на табелата. Единствената лоша вест за домашните е повредата на Салемакерс, кој мораше да го напушти теренот веднаш по асистенцијата.
