Враќањето на Нејмар во репрезентацијата на Бразил за претстојното Светско првенство во Северна Америка е најголемата спортска приказна на неделата, но моментот кога тој дознава за повикот ги разбуди емоциите кај фудбалските фанови ширум светот. Видеото на кое е уловена неговата реакција за неколку минути стана вирален хит, покажувајќи ја целата мака и емотивен товар што 34-годишниот фудбалер ги носеше во себе изминативе години.
Додека седеше во својот дом и го следеше директниот пренос од прес-конференцијата на Карло Анчелоти во Рио де Жанеиро, тензијата кај Нејмар беше очигледна. Во секундата кога италијанскиот стратег го изговори неговото име како дел од напаѓачкиот тим на „кариоките“, бразилската десетка едноставно не издржа. Наместо класично славење, Нејмар почна да плаче, криејќи го лицето во рацете, пред веднаш да падне во цврста и емотивна прегрнатка со својот близок пријател Крис Гедес.
🥺🇧🇷 The moment when Neymar Jr got called up by Carlo Ancelotti…@neymarjr 🎥 pic.twitter.com/xFIxeMh4nw
— Fabrizio Romano (@FabrizioRomano) May 19, 2026
Солзи на олеснување по години поминати во пеколот
Овие солзи најдобро опишуваат низ каков тежок период помина најдобриот стрелец во историјата на Бразил. По страшната повреда на лигаментите во октомври 2023 година и кошмарната епизода во Саудиска Арабија, каде што едвај одигра седум меча, јавноста во Бразил беше тотално поделена и скептична. Многумина сметаа дека неговата кариера на највисоко репрезентативно ниво е завршена и дека неговото тело веќе не може да издржи голем турнир.
Сепак, неговата преродба во матичниот Сантос сезонава му донесе нова шанса, а виралното видео е чист доказ колку многу му значи овој повик. Ова не се солзи на изненадување, туку солзи на огромно олеснување по стотиците часови поминати во тешки рехабилитации и борба со сопственото тело за да се избори за овој момент.
Dünya Kupası kadrosuna çağrılmasının ardından Neymar’ın yaşadığı sevinç.pic.twitter.com/X9unEXIpNx
— Ajansspor (@ajansspor) May 19, 2026
Последното и најважно поглавје
Снимката веднаш предизвика лавина коментари на социјалните мрежи. Навивачите ширум светот се обединија во поддршката, истакнувајќи дека токму оваа страст и искрена емоција го прават Нејмар тоа што е за Бразил – идол на нацијата кој живее за „селесао“.
Сега, кога визата за Америка е обезбедена, пред него е последното и најважно мундијалско поглавје во кариерата. Бразил ја чека титулата уште од 2002 година, а Нејмар со овие солзи покажа дека е подготвен да го остави и последниот атом од себе на теренот за да го донесе шестиот светски пехар онаму каде што припаѓа.
