Неделното попладне во Калчото понуди вистински спектакл. Џенова покажа карактер во неверојатен натпревар, додека Аталанта потврди дека е во страшна форма пред своите навивачи.
Спектакл на „Луиџи Ферарис“: Од 0-2 до 3-2 за Џенова!
Тимот на Даниеле де Роси приреди вистинско чудо против Болоња. Гостите водеа со 2-0 по голот на Фергусон и автоголот на Отоа, а сè изгледаше загубено за домашните. Сепак, црвениот картон на голманот Скорупски во 56-та минута го промени текот на мечот.
Руслан Малиновски со „проектил“ од слободен удар ја врати надежта, а Екубан со спектакуларен волеј израмни на 2-2. Целосниот пресврт и делириум на трибините го донесе Жуниор Месијас во 91-та минута со прекрасен гол во самиот агол за голема победа од 3-2.
Аталанта немилосрдна против Парма
„Божицата“ од Бергамо им се врати на победите на импресивен начин, совладувајќи ја Парма со убедливи 4-0. Џакомо Распадори блесна на своето деби во стартниот состав постигнувајќи гол, а во листата на стрелците се запишаа и Скамака (од пенал), капитенот Де Рон и Крстовиќ во судиското продолжение.
Клучна фигура на мечот беше Шарл Де Кетеларе, кој со својата магија ги подготви повеќето шанси за својот тим.
Сасуоло конечно слави, се врати Доменико Берарди
Сасуоло ја прекина црната серија и ја запиша првата победа во 2026 година, совладувајќи го Кремонезе со минимални 1-0. Единствениот гол го постигна Алиу Фадера уште во 3-та минута, откако најбрзо реагираше на една одбиена топка.
Сепак, најголемата вест за навивачите на Сасуоло е враќањето на теренот на нивниот најдобар фудбалер, Доменико Берарди, кој влезе во игра во 59-та минута по долго отсуство поради повреда.
