Азер Омерагиќ со два гола за три минути ја запечати совршената полусезона за Вардар. „Црвено-црните“ со пресврт славеа над Македонија ЃП (1-2) во Ѓорче Петров и по цели шест сезони пауза, повторно ја освојуваат „есенската круна“ во ПМФЛ.
Шок, па „блицкриг“ на лидерот
Натпреварот започна со доминација на Вардар, но првото полувреме заврши без голови благодарение на одличните интервенции на голманот Јанков и лошите завршници на Закариќ и Талевски. Второто полувреме донесе студен туш за гостите. Во 54-та минута, Колумбиецот Еступињан го матираше Ќосевски и донесе водство за „лавовите“.
Но, радоста на домаќините траеше кратко. Вардар одговори фуриозно:
- 63. минута: Омерагиќ израмни на 1-1 по акција од левата страна.
- 66. минута: Само три минути подоцна, истиот играч погоди за целосен пресврт и 1-2.
Круна по 6 години
Со оваа победа, избраниците на Гоце Седлоски ја завршуваат есента со 13 победи, 3 ремија и само еден бод предност пред упорната Струга Трим Лум. Првенството сега оди на пауза до февруари, а Вардар ќе презими таму каде што навивачите најмногу сакаат да го гледаат, на самиот врв.
Следете нè: Facebook | Instagram | X
