Фудбалерите на Реал Мадрид извојуваа херојска победа над градскиот ривал Атлетико со 3-2, во натпревар кој понуди сè – пресврти, исклучувања и драма до последната секунда. Со овој триумф, тимот на Алваро Арбелоа ја намали разликата на само четири бода во однос на лидерот Барселона и ја одржа жива трката за титулата.
Ладен туш од Лукман и одговорот на „кралевите“
Натпреварот започна со иницијатива на Реал, а Федерико Валверде уште во 9-та минута ја погоди стативата. Сепак, казната стигна во 33-та минута кога засилувањето на Атлетико, Адемола Лукман, го шокираше „Бернабеу“ по брилијантната асистенција на Џулијано Симеоне.
По паузата, видовме „ураган“ од Реал Мадрид. Најпрво Винисиус Жуниор во 52-та минута го скрши својот малер против Атлетико и израмни од пенал, а само три минути подоцна Федерико Валверде со својот петти гол во четири меча донесе целосен пресврт и делириум на трибините.
¿Cómo anotar un doblete?
— Real Madrid C.F. (@realmadrid) March 22, 2026
– Paso 2.#LaLigaHighlights pic.twitter.com/LqO89wWLkn
Молина врати надеж, Трент и Винисиус ставија точка
Драмата не застана тука. Атлетико успеа да израмни во 66-та минута преку Науел Молина, но радоста на „јорганџиите“ траеше кратко. Арбелоа во игра ги внесе Мбапе и Трент Александер-Арнолд, а токму Англичанецот со магична асистенција во 72-та минута го пронајде Винисиус, кој со својот втор гол го врати водството на 3-2.
Црвен картон за Валверде и опсада на голот на Лунин
Последните 15 минути беа вистински тест за нервите на навивачите. Во 77-та минута, Реал остана со играч помалку откако Федерико Валверде заработи директен црвен картон по фаул над Баена.
Атлетико тргна во тотална офанзива, Хулијан Алварез ја погоди стативата, а голманот Андриј Лунин (кој го менуваше повредениот Куртоа) стана херој со неколку клучни интервенции во судиското продолжение. Иако Атлетико во првиот дел од сезоната славеше со 5-2, Реал вечерва сервираше слатка одмазда.
