Vitality со втора мејџор титула во низа: Со 3-1 го совладаа Фазе и станаа шампиони на Старладер Будимпешта!

Француската е-спорт организација Тим Виталити (Team Vitality) ја заокружија фантастичната 2025 година со освојување на својата втора последователна „мејџор“ титула, откако во големото финале на Старладер Будимпешта Мејџор го совладаа Фазе Клан (FaZe Clan) со 3-1. Со ова, Виталити станаа првиот тим што освоил две „Мејџор“ круни по ред, по историскиот успех на Астралис во 2019 година.

Финалето беше прво во историјата на Counter-Strike што се играше во формат „најдобар од пет мапи“ (Bo5).

ZywOo и екипата ја надминаа нервозата

Фазе Клан започнаа силно на својот избор, мапата „Nuke“, каде што победија со 13-6. На таа мапа, ѕвездата на Виталити, Матје „ZywOo“ Хербо, имаше проблеми, но тактичката супериорност на капитенот Ден „apEX“ Мадесклер дојде до израз на следните три мапи:

1. Dust2: Виталити победи со доминантни 13-3. ZywOo се врати во врвна форма и ја заврши мапата со четири елиминации.
2. Inferno: Виталити ја доби мапата со 13-9, благодарение на мајсторската игра на Вилијам „mezii“ Мериман, кој имаше седум мулти-кила и рејтинг од 2.00.
3. Overpass: Серијата заврши со немилосрдни 13-2 за Виталити. Робин „ropz“ Кол имаше мапа на кариерата со 22-7 K-D и рејтинг од 2.89.

Рекорди и признанија

Оваа победа ја цементира позицијата на Виталити како најдобар Counter-Strike 2 тим во 2025 година, со вкупно девет титули на турнирите од највисоко ниво.

• apEX го стигна рекордот: Капитенот apEX сега се израмни со легенди како Магиск, Девајс, Глајв и Ксип9кс по вкупен број освоени „Мејџор“ титули (четири), и заостанува само зад Дупри (пет).
• ZywOo – MVP феномен: Францускиот играч ZywOo е прогласен за МВП на турнирот, со што стана единствениот играч во историјата што освоил три МВП медали на „Мејџор“ турнири, и втор што освоил две по ред во иста година (по колдзера во 2016).
• ropz – три Мејџор титули: Естонецот ја освои својата трета „Мејџор“ титула во трето последователно финале, победувајќи го тимот Фазе од кој замина кон крајот на 2024 година.

Фазе Клан, кои имаа „магичен“ поход до финалето по тежок старт на турнирот, не можеа да го повторат својот пресврт против недопирливиот Виталити. Капитенот на Фазе, Фин „karrigan“ Андерсен, изјави дека е неверојатно горд на тимот, со оглед на тоа што пред само еден месец биле во многу тешка ситуација.

Македонецот Дамјан „Kyxsan“ Стоилковски дел од спектаклот

Нашиот „Kyxsan“, кој настапува за тимот „Фалконс“ (Falcons) беше дел од гејмерскиот спектакл во Будимпешта. Неговиот тим изгуби во четврт-финалето од „Тим Спирит“ (Team Spirit) со 2:0.

„Уште еднаш ја завршивме сезоната на разочарувачки начин. Нашите очекувања беа поголеми од тоа, но за жал овој пат не го заслуживме тоа. Сега нема што повеќе да се направи од тоа да се работи напорно и да се вратиме посилни идната сезона. Ви благодарам на сите за поддршката“, напиша тој на социјалните медиуми.

Но и покрај поразот, успехот да се стигне до спектаклот кој го следеа огромен број луѓе е огромен и ние му порачуваме на Дамјан само „главата горе“. Ние сме горди што имаме таков претставник во светот на е-спортот и сигурни сме дека твоето време ќе дојде да го кренеш трофејот.

Погледнете дел од спектаклот кој се одвиваше четири дена во Будимпешта!