Македонскиот ракометен бренд, РК Вардар, утревечер се враќа на европската сцена во рамките на третото коло од главната фаза во Лига Европа. Во Скопје гостува португалска Бенфика, тим против кој „црвено-црните“ имаат нерасчистени сметки од првиот меѓусебен дуел во Лисабон.
Чупиќ: Живееме за овој натпревар, мораме да бидеме на „300 на саат“
На денешната прес-конференција, тренерот Иван Чупиќ испрати јасна и мотивирачка порака до своите ракометари, но и до навивачите. Легендарното крило, сега во улога на стратег, потенцираше дека за Вардар не постои „утре“, туку само фокус на следните 60 минути.
„Утре живееме само за овој натпревар. Не нè интересира што било претходно, ниту што следи понатаму. Сакаме полн ‘Јане Сандански’ и сакаме да го покажеме нашето вистинско лице. Во Лига Европа мора да бидеме на ‘300 на саат’. Нема луксуз, нема избор – само работа, дисциплина и карактер“, дециден е Чупиќ.
Дури и со одредени кадровски проблеми (неизвесноста околу Јака), планот останува ист – борба до последен здив против еден од најсилните тимови во групата.
Митровиќ: Им останавме должни на навивачите
Десниот бек Урош Митровиќ призна дека тимот не го покажа најдоброто издание на гостувањето во Португалија, па затоа сега мотивот е двојно поголем.
„Ако не успеавме да се покажеме во Лисабон, сега ќе го дадеме максимумот. Останавме должни. Се надевам дека ќе го наполниме ‘Јане Сандански’ и заедно со навивачите ќе дојдеме до победа која ќе нè приближи до пласман понатаму“, истакна Митровиќ.
Информации за натпреварот и билети
Натпреварот се игра утре (вторник) со почеток во 20:45 часот во СЦ „Јане Сандански“. Билетите се веќе во продажба преку платформата TicketX, а од клубот апелираат на масовна поддршка од трибините за да се создаде препознатливиот „пекол“ во кој паѓале и многу поголеми гиганти.
