По само 14 месеци на кормилото на „црвените ѓаволи“, ерата на Рубен Аморим во Манчестер Јунајтед заврши со предвремен отказ. Одлуката на раководството доаѓа по вчерашното реми против Лидс (1-1), резултат кој го остави тимот на шесттото место во Премиер лигата, но вистинската причина за разделбата лежи во целосниот колапс на односите помеѓу Португалецот и управата на клубот.
Привременото решение на клупата ќе биде легендарниот Дарен Флечер, кој досега го предводеше тимот до 18 години. Флечер ќе го води тимот в среда на гостувањето кај Барнли, додека потрагата по трајно решение е одложена за претстојното лето.
Точка од која нема враќање: „Јас сум менаџер, а не тренер!“
Тензиите кои тлееја со месеци ескалираа на прес-конференцијата по мечот на „Еланд Роуд“. Аморим отворено го предизвика раководството предводено од Омар Берада и Џејсон Вилкокс, нагласувајќи дека тој сака целосна контрола врз тимот, а не само улога на „тренер на теренот“ кој ќе ги извршува замислите на спортскиот сектор.
„Јас сум менаџер на Јунајтед, а не само тренер. Нема да си заминам сам, ќе ја вршам мојата работа додека не дојде друг да ме замени“, изјави Аморим само неколку часа пред да му биде врачен отказот.
Главните точки на спорот беа неговата тактичка нефлексибилност и инсистирањето на формацијата 3-4-3, за која раководството сметаше дека не одговара на профилот на играчите. Дополнително, Аморим беше фрустриран од пасивноста во јануарскиот преоден рок, откако клубот не успеа да го донесе Антуан Семењо од Борнмут.
Најскапиот неуспех на ИНЕОС
Отказот на Аморим е тежок удар за репутацијата на Сер Џим Ретклиф и групацијата ИНЕОС. Откако платија 11 милиони евра за да го извлечат од Спортинг, Јунајтед под водство на Аморим ја забележа најлошата сезона во својата историја во Премиер лигата (15-то место во 2024/25) и остана без излез во Европа за првпат по 2014 година.
И покрај тоа што летово беа потрошени над 200 милиони фунти на засилувања како Бењамин Шешко, Брајан Мбеумо и Матеус Куња, резултатите не се подобрија драстично. Јунајтед оваа сезона го имаше најлошиот старт на кампањата од 1992 година, со само седум бода во првите шест кола.
Клубот на „отпишани“ менаџери
Аморим е шесттиот постојан менаџер кој си заминува од „Олд Трафорд“ по повлекувањето на Сер Алекс Фергусон во 2013 година. Со неговото заминување, вкупната сума која Јунајтед ја потрошил само на отштети за отпуштени менаџери надмина 50 милиони фунти.
Бидејќи во неговиот договор немаше клаузула за предвремено раскинување, клубот ќе мора да му ја исплати целата плата до 2027 година, што дополнително ќе ја оптовари веќе разнишаната финансиска состојба.
Следете нè: Facebook | Instagram | X
