Македонскиот ракометар Филип Талески официјално ја продолжува својата кариера во унгарскиот шампионат. По неколкумесечна пауза и заминувањето од редовите на РК Вардар, левиот бек денеска беше промовиран како ново големо засилување за тимот на Татабања.
Итна реакција на Унгарците по серијата повреди
Тимот на Татабања се соочува со сериозни кадровски проблеми и голем број на повредени клучни играчи, што ја принуди управата на клубот брзо да реагира на пазарот. Изборот падна токму на Талески, кој како слободен агент веднаш му се стави на располагање на новиот тренер.
„За жал, бројот на повредени играчи кај нас постојано се зголемува. Моравме да преземеме чекори за да обезбедиме соодветен ростер за остатокот од сезоната. Филип Талески ни се приклучува и со своето искуство ќе ни помогне на двата дела од теренот. Одиме напред, ‘Тигри’!“, стои во официјалното соопштение на унгарскиот клуб.
Потврда на квалитетот по епизодата во Скопје
Разделбата на Талески со Вардар по само неколку месеци од неговото враќање во „црвено-црниот“ дрес беше изненадување за јавноста, но крушевчанецот не чекаше долго за нов интернационален предизвик. За него ова е враќање на големата сцена по претходните искуства во Германија и Португалија.
Со оглед на тоа што 28-годишниот бек веќе одреден период тренираше индивидуално, овие неколку недели до продолжувањето на унгарскиот шампионат ќе му бидат добредојдени за целосна адаптација и вклопување во системот на Татабања.
