Денеска во Барселона официјално започна новата ера на Формула 1. На патеката „Каталуња“ се појавија првите болиди конструирани според драстично новите правила за 2026 година, но наместо вообичаениот спектакл со илјадници фанови и новинари, спортот се соочи со невидена досега тајност.
Зошто „Шејкдаунот“ во Барселона е приватен?
За разлика од претходните години, тимовите овојпат се одлучија за „затворени врати“. Причината е едноставна – новите регулативи се најголемите во историјата на спортот (целосно нови шасии, мотори, активна аеродинамика и одржливи горива). Екипите се плашат од потенцијални дебакли со веродостојноста на болидите и сакаат да ја контролираат пораката во јавноста додека не ги решат почетните проблеми.
Безбедноста околу патеката беше на ниво на воена база, дури и познатиот рид „The Hill“, каде фановите со децении бесплатно гледаа тестирања, беше прогласен за забранета зона.
Ауди „’ржи“ во Барселона, Хас изненади со издржливоста
И покрај информативниот мрак, неколку вести сепак „протекоа“. Најголемо внимание привлече новиот германски гигант Ауди. Тимот го објави првото видео од нивниот болид на патеката, а шефот Џонатан Витли потврди дека новиот мотор звучи многу поагресивно од сегашните.
Изненадување на денот беше тимот на Хаас. Под водство на Ајао Комацу, тие комплетираа дури 67 кругови во утринската сесија, што е огромен успех за прв ден со вака комплексна технологија.
„Откриваме проблеми во секој круг, но затоа сме тука. Многу сум среќен како започнавме“, изјави Комацу.
Кој доцни, а кој е веќе таму?
Сите 11 тимови ќе имаат можност да ги тестираат своите болиди во Барселона и Бахраин, што е промена од минатата сезона, но во петдневното тестирање во Барна, секој тим ќе може да искористи три дена за тестирање.
- Ферари веќе го „прошета“ својот болид со Хамилтон и Леклер на приватната патека Фиорано пред да го испрати во Шпанија.
- Ред Бул и Ред Бул Рејсинг денеска излегоа на патеката во Барселона.
- Кадилак исто така ги направи првите километри, а Валтери Ботас потврди дека неговиот приоритет е само издржливоста.
- Мекларен и Астон Мартин се одлучија да го почекаат крајот на неделата, додека Вилијамс е единствениот тим кој целосно ќе го пропушти овој петдневен тест.
Ова е само првиот од трите претсезонски тестови. Вистинскиот спектакл и првите преноси во живо на ТВ ги очекуваме во Бахреин во текот на февруари, пред премиерата во Австралија на 8-ми март.
Погледнете ја фотогалеријата од првите болиди кои излегоа на патеката во Барселона.
