Италијанските судиски аналитичари, Лука Марели и Грацијано Чезари, беа едногласни во своите оценки по натпреварот: Исклучувањето на Пјер Калулу во 42-та минута е „многу сериозна грешка“ на судијата Федерико Ла Пена која директно влијаеше на исходот на големото дерби.
Симулација на Бастони која го измами судијата
Инцидентот кој го промени текот на мечот се случи пред самиот крај на првото полувреме. Калулу веќе имаше жолт картон кога во еден дуел со Алесандро Бастони, дефанзивецот на Интер падна како „покосен“. Ла Пена веднаш го извади вториот жолт картон, оставајќи ги играчите на Јувентус во шок.
„Ова е огромна грешка. Вториот жолт картон е непостоечки. Немаше никаков контакт меѓу Калулу и Бастони, имаше јасна дистанца меѓу играчите. Ла Пена имаше чист поглед, но тотално потфрли“, изјави поранешниот судија Грацијано Чезари за „Sport Mediaset“.
Зошто ВАР не реагираше?
Љубителите на фудбалот со право се прашуваат зошто технологијата не ја поправи неправдата. Протоколот на ВАР е строг – технологијата не смее да интервенира за жолти картони, дури и кога станува збор за втор жолт картон кој води до исклучување. Калулу залудно правеше гестикулации со рацете барајќи проверка; правилата во овој случај ги врзаа рацете на ВАР собата.
„Неспортски“ потег на Бастони?
Аналитичарите отидоа чекор понатаму, тврдејќи дека наместо Калулу да биде исклучен, Бастони требало да добие втор жолт картон за симулација. Она што дополнително ги изнервира навивачите на Јувентус беше снимката на која се гледа како Бастони слави веднаш зад грбот на очајниот Калулу додека тој го напушташе теренот.
Интересно е што тренерот на Интер, Кристијан Киву, изгледа беше свесен дека Бастони „оди по работ“, па веднаш го извади од игра на полувремето за да спречи евентуално компензирање од страна на судијата.
