Изминатата ноќ во НБА лигата ќе остане запишана во историските книги. Додека Леброн Џејмс и Кевин Дјурант препишуваа нови страници од кошаркарската историја, терените ширум Америка беа сведоци на жестоки тепачки, победи со звук на сирената и драматични пресврти.
Оклахома Сити Тандер 132 – 111 Вашингтон Визардс
Шеј Гилџус-Александер уште еднаш потврди зошто е актуелен МВП, постигнувајќи 40 поени во 11-та последователна победа на Оклахома. Сепак, натпреварот го одбележа масовна тепачка во втората четвртина која траеше цели 11 минути.
По кошот на Вашингтон, Џејлин Вилијамс и Џастин Шампањ влегоа во клинч, кој брзо прерасна во хаос во кој учествуваа речиси сите играчи, па дури и паднаа врз снимателите зад кошот. Епилогот: четворица исклучени играчи (Шампањ од Вашингтон, и Вилијамс, Мичел и Валас од Оклахома).
И покрај тоа што останаа без три играчи, „Громовите“ доминираа. Исаија Хартенштајн имаше нестварна статистика со 9 поени, 20 скока и 10 асистенции, додека Вашингтон го запиша 15-тиот пораз по ред.
Хјустон Рокетс 123 – 122 Мајами Хит
Историја во Тексас! Кевин Дјурант постигна 27 поени и официјално го престигна Мајкл Џордан на вечната листа на стрелци, искачувајќи се на петтото место со 32.294 поени.
Самиот финиш на мечот беше вистински трилер. Мајами водеше со 122-121 на 5 секунди до крајот, Дјурант шутираше за победа и промаши, но Амен Томпсон го поправи промашувањето со звук на сирената за делириум во Хјустон.
Орландо Меџик 104 – 105 Лос Анџелес Лејкерс
Вечерта на „Кралот“! Леброн Џејмс го одигра својот 1.612-ти натпревар во кариерата, станувајќи рекордер во историјата на НБА по бројот на настапи. Јубилејот беше зачинет со драматична победа.
Иако Леброн беше лидер во текот на целиот меч, победата ја донесе Лук Кенард со тројка во последната секунда (0.6 до крајот). Ова е деветта победа во низа за Лејкерси, кои цврсто го држат третото место на Западот.
Сан Антонио Спaрс 134 – 119 Индијана Пејсерс
Избраниците на Мич Џонсон продолжуваат да газат. Со 53-та победа во сезоната го обезбедија својот најдобар скор уште од 2017 година. Виктор Вембањама повторно ги пополни сите колони (20 поени, 8 скока, 6 асистенции и 5 блокади), додека Келдон Џонсон и дебитантот-стартер Дилан Харпер уфрлија по 24 поени. Индијана, минатогодишниот финалист, го допре дното со 16-от пораз по ред.
Њу Орлеанс Пеликанс 106 – 111 Кливленд Кавалирс
Кливленд покажа карактер во Њу Орлеанс. Домаќините имаа предност од 12 поени пред последната четвртина, но тогаш се „разбуди“ Џејмс Харден. По нула поени во првото полувреме, Харден постигна 20 во второто (13 во последната четвртина), а со помош на Донован Мичел (27 поени), „Коњаницата“ направи пресврт и ја прекина домашната серија на Пеликанс од седум победи.
Далас Маверикс 131 – 138 Лос Анџелес Клиперс (Продолжение)
Драмата во Далас не престанува – Маверикс го запишаа 11-от последователен пораз дома, што е нивна најлоша серија во последните 32 години. Дариус Гарланд со рекордни 41 поен ги предводеше Клиперси, а Каваи Леонард (34 поени) го изнуди продолжението. Во дополнителните пет минути, Клиперси беа посмирени и ја однесоа победата од Тексас.
Атланта Хокс 126 – 110 Голден Стејт Вориорс
Дајсон Даниелс одигра меч на кариерата постигнувајќи 28 поени, водејќи ја Атланта до убедлива победа над Вориорс. „Јастребите“ брзо се опоравија од вчерашниот пораз од Хјустон и ја забележаа 10-та последователна победа на домашен терен. Голден Стејт, кој сè уште чека на враќање на клучните повредени играчи, претрпе осми пораз во последните девет натпревари.
Шарлот Хорнетс 124 – 101 Мемфис Гризлис
ЛаМело Бол беше незапирлив во Шарлот, постигнувајќи 29 поени со дури седум погодени тројки. Хорнетс се во одлична серија со пет победи на последните шест меча и сериозно притискаат за место во плеј-ин турнирот. Мемфис, од друга страна, продолжува да тоне со 10 порази во последните 11 средби.
Јута Џез 116 – 126 Филаделфија 76ерс
Филаделфија оствари важна победа на гостински терен, доминирајќи во рекетот каде постигна дури 74 поени. Квентин Грајмс со 26 поени и младиот Ви-Џеј Еџком со 22 поени и 13 скока беа предводници на „Сиксерси“. Кај Јута, Ејс Бејли беше најефикасен со 25 поени, но тоа не беше доволно за да се запре расположениот гостин.
Финикс Санс 105 – 108 Милвоки Бакс
Иако десеткувани, кошаркарите на Милвоки успеаја да слават во Аризона. Рајан Ролинс одигра фантастичен меч со 26 поени и 10 скока, вклучувајќи го и клучниот кош на 23 секунди до крајот. Кај Финикс, Џејлен Грин беше најефикасен со 24 поени, додека Девин Букер потфрли со само 14 поени и очаен шут од игра (4/17).
