Футсал репрезентацијата на Македонија го заокружи својот брилијантен настап на претквалификацискиот турнир за Светското првенство со стил! Избраниците на селекторот Газменд Хисејини вчера попладне во Вилнус забележаа и трета победа во низа, совладувајќи го домаќинот Литванија со минимални, но злато вредни 0:1.
Со овој триумф, нашите момци го потврдија апсолутното лидерство во Групата Ц, завршувајќи го турнирот со максимални 9 бодови и импресивна гол-разлика од +7, со што си обезбедија пласман во главната рунда од мундијалските квалификации.
Натпреварот против мотивираните Литванци, на кои им беше неопходна победа, очекувано беше тврд и неизвесен. Двете репрезентации играа внимателно, а клучниот момент кој го реши победникот се случи во 14-тата минута од првото полувреме. Игор Леовски одлично асистираше, а Бојан Јанев со прецизен удар ја затресе мрежата на домаќините за водство од 0:1.
Во продолжението од натпреварот, македонските футсалци покажаа зрелост и одлична тактичка дисциплина, успешно одбивајќи ги сите напади на Литванија која очајнички се обидуваше да стигне до израмнување (имаше 53% посед на топка и 7 изведени корнери).
Да потсетиме, патот до овој перфектен биланс Македонија го започна со убедлива победа над Бугарија (4:1), по што следуваше уште едно доминантно издание и триумф над Турција (6:3).
Конечната табела во Групата Ц изгледа вака:
- Македонија – 9 бода (+7 гол разлика)
- Литванија – 4 бода (+2)
- Турција – 4 бода (+1)
- Бугарија – 0 бода (-10)
