Нашите млади кадетки и кадети направија подвиг за почит и се пласираа во двете големи финалиња на Светското училишно првенство во ракомет. Утре, Скопје е центарот на ракометниот свет, а нашите млади таленти имаат потреба од вашата поддршка за да го искачат највисокиот врв.
Федерацијата на училишен спорт на Македонија испраќа отворен повик до целата јавност – да ја наполниме салата и да бидеме „осмиот играч“ на нашите ракометни надежи.
Распоред на финалните натпревари (28.04.2026, вторник):
Место: Голема сала „Јане Сандански“, Скопје Влез: СЛОБОДЕН за сите навивачи
- 14:00 часот: Македонија – Хрватска (Женско финале)
- 16:00 часот: Македонија – Израел (Машко финале)
Тие се веќе наши шампиони
Нашите момци и девојки во изминатите денови покажаа врвен квалитет, борбеност и фер-плеј, достоинствено претставувајќи ја земјата пред очите на светот. За Федерацијата тие веќе го остварија својот успех со самиот пласман во завршницата, но утре е шансата да се испише историја на домашен терен.
„За нас, како Федерација, тие веќе се шампиони. Им благодариме за одличните натпревари и достоинственото претставување на нашата земја во најдобро светло. Ве повикуваме сите заедно да им дадеме ветар во грб во одлучувачките битки за златото“, велат од Федерацијата на училишен спорт.
Утре е денот кога боите на Македонија треба да доминираат во „Јане Сандански“. Без разлика дали сте долгогодишен вљубеник во ракометот или едноставно сакате да им дадете поддршка на младите таленти, вашето присуство на трибините ќе биде од пресудно значење.
