Она што се очекуваше како најприроден тек на настаните по историските успеси, денеска доби и официјална потврда. Шпанската МотоГП легенда, Марк Маркез, го продолжи својот договор со фабричкиот тим на Дукати (Ducati Lenovo Team) за дополнителни две сезони, со што се обврза да остане во италијанскиот табор во 2027 и 2028 година.
Ова продолжување на соработката доаѓа по неверојатната повратничка сезона во 2025 година, кога популарниот „број 93“ доминираше на патеките со 14 спринт победи и 11 Гран-при триумфи. Маркез тогаш уште во Јапонија ја осигура својата седма МотоГП титула (вкупно деветта во кариерата), поставувајќи го воедно и апсолутниот рекорд по бројот на освоени поени во една сезона.
Јубилеи во актуелната 2026 година
Иако актуелната 2026 сезона за Маркез започна тешко и беше забавена поради повреда, Шпанецот брзо се врати во игра за самиот врв благодарение на врзаните победи на патеките во Балатон Парк (Унгарија) и Брно (Чешка).
Победата во Унгарија имаше дополнително значење бидејќи беше јубилејна 100-та победа во МотоГП за фабричкиот тим на Дукати, но и 100-та победа за самиот Маркез во сите класи, што донесе совршена честитка за стогодишниот јубилеј од постоењето на италијанскиот бренд.
„Јас сум црвен. Навистина сум среќен со овој нов договор и што продолжувам да бидам дел од ова семејство“, изјави Маркез по потпишувањето. „Кога одлучив да му се приклучам на Дукати, бев убеден дека ова е најконкурентниот проект. Во нашата прва заедничка година се боревме за титулата и ја освоивме, што потврдува дека изборот беше вистински. Сè додека сум тука, ќе давам сè од себе за да ја обојам иднината во црвено“.
Инженерите и раководството во делириум
Генералниот менаџер на Дукати Корсе, Луиџи Далиња, не го криеше своето воодушевување од можноста да продолжи да работи со еден од најголемите возачи на сите времиња:
„Довербата меѓу Дукати и Марк започна од моментот кога тој нè избра нас. Како инженер, фасциниран сум од начинот на кој работи. Тој го донесе нашиот мотор ’Desmosedici GP’ до врвни перформанси, подобрувајќи ја секоја поединечна компонента. Среќен сум што ќе пишуваме ново поглавје заедно“.
Извршниот директор Клаудио Доменикали исто така додаде дека Маркез совршено го претставува менталитетот на Дукати, носејќи извонреден натпреварувачки дух, но и одлична хармонија и професионализам во соблекувалната.
Следен предизвик за Маркез и Дукати е претстојното Гран-при на Холандија викендов во Асен, каде Шпанецот ќе брка трета последователна победа во шампионатот.
