Само еден ден откако Дукати го потврди заминувањето на Франческо „Пеко“ Бањаја и доаѓањето на Педро Акоста, пристигна уште една спектакуларна вест која целосно ја тресе МотоГП сцената. Двократниот светски шампион официјално потпиша нов четиригодишен договор со фабричкиот тим на Априлија, кој ќе стапи на сила од 2027 година!
Она што со месеци се шпекулираше низ падокот како „јавна тајна“, сега доби официјална потврда. Бањаја ја одбрал Априлија пред понудата од Јамаха уште за време на претсезонските тестови во февруари. Она што е особено невообичаено во светот на мотоспортот е должината на договорот. Пеко се обврза на верност кон Априлија на цели четири години, што значи дека ќе остане во тимот до својата 34-та година во 2030 година.
Создавање на италијански „Дрим-тим“ пред новата ера
Со овој потег, Априлија создава целосно италијанска постава, бидејќи Бањаја ќе вози рамо до рамо со својот добар пријател и актуелен лидер во шампионатот, Марко Бецеки. Доаѓањето на двократен шампион е огромен чекор за производителот од Ноале, особено пред големите промени во техничките правила кои ќе стапат на сила во 2027 година.
Генералниот извршен директор на Априлија Рејсинг, Масимо Ривола, не го криеше задоволството од овој историски потпис, потенцирајќи ја важноста за италијанскиот спорт.
„Микеле Коланино (Извршен директор на Пијаџо) и јас ја споделуваме истата визија за поддршка на Италија, поради што и двајцата помисливме на Марко и Пеко заедно за следното поглавје на Априлија Рејсинг. Доаѓањето на Бањаја е потврда за вредноста на италијанскиот спорт, кој во последните месеци се истакнува на светската сцена благодарение на Кими Антонели во Формула 1, Јаник Синер во тенисот и Федерика Брињоне на Зимските олимписки игри. Да имате повеќекратен светски шампион е одговорност која едвај чекаме да ја преземеме. Ќе му посакаме топло добредојде, но прво ќе се обидеме да го победиме!“.
Што значи ова за трансфер-пазарот?
Доаѓањето на Бањаја во Априлија значи дека актуелниот возач на тимот, Хорхе Мартин, ќе се пресели во фабричкиот тим на Јамаха, каде ќе го замени Фабио Квартараро (кој заминува во Хонда). Негов тимски колега во Јамаха ќе биде Аи Огура, кој доаѓа од сателитскиот тим на Тракхаус.
Инаку, Бањаја зад себе остава импресивно наследство во досегашната кариера. Со вкупно 41 победа, 86 подиуми и 35 пол-позиции во премиерната класа, тој се вбројува меѓу најуспешните италијански возачи на сите времиња, веднаш зад легендите Џакомо Агостини и Валентино Роси.
