Првиот човек на светскиот фудбал се наоѓа во сериозна паника. Откако во јавноста протече скандалозниот план за продажба на дел од комерцијалните права на ФИФА, Џани Инфантино започна масовна ПР кампања за спас на сопствениот углед и фотелја. Преку писмо испратено до сите 211 земји-членки и до Советот на ФИФА, Швајцарецот одеднаш стана голем поборник за „дијалог, реформи и транспарентност“.
План за спас на угледот или вистинска реформа?
Во пресрет на состанокот на Советот на ФИФА закажан за 15 октомври, Инфантино предлага два чекори за „демократизирање“ на процесите. Првиот е ангажирање на независна надворешна ревизија која ќе го оцени начинот на кој ФИФА носи стратешки одлуки. Вториот чекор е отворање на консултации со конфедерациите за тоа како да се зајакне транспарентноста и отчетноста на претседателот и Советот.
Инфантино во писмото патетично нагласува дека „демократските процеси, независноста и спортскиот авторитет на ФИФА никогаш не биле на продажба, ниту пак некогаш ќе бидат“. Но, овие зборови малку ја губат тежината ако се земе предвид причината поради која ова писмо воопшто е напишано.
Скандалот од 4,2 милијарди долари
Целата оваа наводна желба за реформи е само реакција на пропаднатиот проект „FIFA Forward Enterprise“ (FFE). Да потсетиме, планот (кој Инфантино се обиде да го протне далеку од очите на јавноста) предвидуваше американскиот инвестициски фонд „Thrive Eternal“, предводен од Џошуа Кушнер, да откупи 20% од комерцијалните и натпреварувачките операции на ФИФА (вклучувајќи ги и машките и женските Светски првенства) за вртоглави 4,2 милијарди долари.
Откако планот протече во медиумите и наиде на жесток отпор, Инфантино беше принуден да го повлече. Сега, во своето писмо, тој се правда дека тоа било „само предлог, а не конечна одлука“ и дека јавноста добила погрешен впечаток бидејќи информацијата протекла „без целосниот контекст“. Тој дури и најави дека ФИФА ќе продолжи да бара „одржливи начини“ за зголемување на ресурсите, што значи дека амбицијата за вакви мега-договори останува.
Отворениот конфликт со УЕФА и претстојните избори
Додека Инфантино зборува за демократија, неговиот однос со УЕФА и претседателот Александар Чеферин е на историски најниско ниво. Европската куќа на фудбалот дури поднесе и правни документи во САД, обвинувајќи го Инфантино за „криминално лошо работење“, на што ФИФА возврати со обвинувања за „валкана кампања“.
И покрај отворените повици од Чеферин и првиот човек на КОНКАКАФ, Виктор Монтаљани, да поднесе оставка, Инфантино нема намера да си замине. Напротив, тој ќе се кандидира на изборите во март 2027 година. Засега, на нецели два месеци пред истекот на рокот за пријавување (18 ноември), Инфантино останува единствениот кандидат за челната позиција.
