Македонската кошаркарска репрезентација добива значајно засилување пред стартот на претквалификациите за Евробаскетот 2029. Искусното крило Адем Мекиќ, кој поради повреда ги пропушти претходните дуели со Романија и Унгарија, сега е целосно подготвен и мотивиран за дуелот со Азербејџан.
Мекиќ верува дека овој ростер, засилен со повратниците, има поголем квалитет од оној во летниот период.
Спој на младост и искуство
„Имаме играчи како Војдан Стојановски, Стојан Ѓуроски, тука е и Андреј Јакимовски. Сигурно на хартија сме подобра, поискусна и подоминантна екипа од што бевме летоска“, изјави Мекиќ, додавајќи дека очекува позитивни резултати.
Домашниот терен е клуч
За натпреварот против Азербејџан (четврток, 19:00 часот, СРЦ Кале), Мекиќ смета дека пресуден фактор нема да биде тактиката, туку енергијата.
„Овој циклус е таков каде нема многу време за тактика. Ќе одлучува тимската хемија и енергијата. Првиот меч го играме дома, тоа е голем плус за нас“, истакна репрезентативецот.
За противникот, тој додаде дека информациите говорат за екипа која игра „цврста кошарка“, но верува дека стручниот штаб ќе го подготви тимот за предизвикот.
Следете нè: Facebook | Instagram | X
