Во модерниот фудбал, правилата на игра сè почесто се диктираат во судниците отколку на зелениот терен. Најновата бура во англиската Премиер лига се заканува да прерасне во сериозна правна војна, откако Евертон (со поддршка од Нотингем Форест) почна да ги разгледува сите правни опции за тужба против раководството на лигата поради очигледните „двојни аршини“ во казнувањето.
Она што започна како тивко незадоволство, сега е отворен револт. Додека „Карамелите“ крвареа на табелата со одземени бодови, лондонски Челси за сериозни финансиски малверзации доби само – блага парична казна.
Гревот на Челси и „тајните исплати“
За што точно станува збор? Минатата недела, Премиер лигата го казни Челси со 10.75 милиони фунти и условна забрана за трансфери. Причината? Прикривање на дури 47.5 милиони фунти преку 36 тајни исплати кон агенти и играчи во периодот од 2011 до 2018 година, додека клубот беше под сопственост на Роман Абрамович.
Овие пари под маса помогнаа Челси да донесе ѕвезди како Еден Азар, Немања Матиќ и Вилијан. Сепак, наместо драстично одземање на бодови, Премиер лигата се одлучи за финансиска спогодба, правдајќи се дека новите сопственици (Clearlake Capital) самите ги пријавиле нерегуларностите.
Фрустрацијата на Евертон и Форест
Оваа одлука предизвика ерупција од гнев во Ливерпул и Нотингем. Евертон минатата сезона беше казнет со одземање на 8 бода, а Нотингем Форест со 4 бода, поради прекршување на правилата за профит и одржливост (PSR).
Нивниот главен аргумент е едноставен и крајно логичен: Каде е тука спортската предност? Во пресудите против Евертон и Форест, лигата постојано нагласуваше дека прекумерното трошење (дури и за изградба на нов стадион) им донело „нефер спортска предност“ на теренот. Од друга страна, во пресудата за Челси, терминот „спортска предност“ воопшто не се ни споменува, иако со помош на тие тајни трансфери лондонскиот клуб освои дури осум трофеи, вклучувајќи и две титули во Премиер лигата. Клубовите бараат официјално објаснување како е можно купувањето на играчи со тајни пари да не претставува предност на теренот.
Стравот од преседан: Што ќе се случи со Сити?
Да се вратиме на хаосот во Англија. Најголемата загриженост меѓу останатите премиерлигаши не е само Челси, туку преседанот кој оваа блага казна го поставува пред „судењето на векот“ – 115-те обвиненија против Манчестер Сити.
Ако Премиер лигата покажува ваква флексибилност кон еден гигант, клубовите како Арсенал, Тотенхем, Ливерпул и Манчестер Јунајтед стравуваат дека правдата нема да биде задоволена ниту во случајот со „Граѓаните“. За потсетување, овие клубови уште пред две години ги резервираа своите права за тужба и барање отштета доколку Сити биде прогласен за виновен од независниот трибунал.
Додека адвокатите ги подготвуваат своите папки, навивачите на социјалните мрежи веќе си фаќаат сеир со апсурдноста на ситуацијата. Најпопуларниот коментар на социјалните мрежи деновиве гласи: „Челси ги прекрши правилата? Одлично, казна од 10 бода за Евертон!“
Иронијата е горчлива, но ја отсликува реалноста во која се наоѓа најбогатата лига на светот, систем во кој правилата очигледно не важат подеднакво за сите.
