НБА се соочува со еден од најголемите скандали во својата понова историја, откако тренерот на Портланд Трејлблејзерс, Чонси Билипс, и кошаркарот на Мајами Хит, Тери Розиер, беа уапсени како дел од федерална истрага поврзана со нелегални обложувања и измами во покер игри.
Според официјални извори, Розиер бил приведен во Орландо, каде што неговиот тим гостуваше во средата навечер. Обвиненијата против него се поврзани со наводно договарање со членови на обложувачка мрежа, на кои им откривал дека ќе го напушти натпреварот предвреме поради “повреда”, овозможувајќи им да се обложат на неговите “потфрлања” со сигурна добивка. Според обвинението, при еден ваков случај неговите познаници добиле над 200.000 долари, а дел од парите биле испорачани директно во домот на Розиер.
Билипс, поранешен НБА шампион и член на Куќата на славните, исто така е обвинет, заедно со поранешниот асистент тренер на Кливленд, Дејмон Џоунс. Истрагата опфаќа две одделни, но поврзани линии – една за спортско обложување и друга за наместени покер игри.
Забрането обложување за играчи и тренери
НБА има строги правила кои забрануваат играчите, тренерите и официјалните лица да се обложуваат на натпревари или настани поврзани со лигата. Во официјалниот кодекс на однесување јасно стои дека секој обид за учество во забрането обложување, дури и преку трети лица, се смета за сериозно прекршување.
Овие правила се слични на оние во МЛБ и НФЛ, каде што казните за вакви прекршоци можат да значат и доживотна забрана. Минатата година, лигата трајно го суспендираше Џонтеј Портер од Торонто поради обложување и откривање на доверливи информации.
Договорот на Билипс во опасност
Иако Билипс потпиша продолжување на договорот со Портланд на крајот од минатата сезона, неговата иднина е под знак прашалник. Според изворите, договорите на тренерите содржат клаузули за “морална одговорност”, што овозможува клубовите да ги раскинат без обврска за исплата доколку лицето предизвика правна или репутациска штета на франшизата.
НБА и партнерствата со обложувачници
Интересно е што скандалот доаѓа во момент кога НБА има силни партнерства со обложувачки компании како “FanDuel” и “DraftKings”, што ја прави границата меѓу маркетинг и морална одговорност сѐ потешка за одржување. Откако легалното спортско обложување беше дозволено во САД во 2018 година, лигата профитираше од нови приходи, но со тоа се зголемија и ризиците од вакви случаи.
Дополнителни детали
На денешната прес-конференција во Њујорк, претставници на Федералното биро за истраги (ФБИ) потврдија дека НБА целосно соработува со истражните органи, и дека случајот нема поврзаност со колеџ спортот. Истовремено, беше откриено дека ФБИ веќе подолг период истражува можни случаи на местенки на универзитетски натпревари во кои се вмешани најмалку пет институции.
Истражната приказна е во развој, и се очекува повеќе информации во наредните денови.
