Она што долго време се шпекулираше, сега добива официјална потврда од најдобро информираните извори. Антоан Гризман, најдобриот стрелец во историјата на Атлетико Мадрид, кариерата ќе ја продолжи во САД. Како што пренесува „The Athletic“, напаѓачот добил дозвола од својот клуб да ги искористи слободните денови за да отпатува во Флорида и да ги финализира деталите со тимот на Орландо Сити.
Договор до 2028 година и култната „седмица“
Францускиот ас ќе потпише договор до крајот на сезоната 2027/28, со опција за продолжување на уште една година. Интересно е што Гризман во Орландо веднаш ќе ја преземе својата омилена „седумка“, а неговото пристигнување е најавено за претстојното лето, откако ќе ја заврши мисијата со Атлетико во Лигата на шампионите и Копа дел Реј.
Гризман никогаш не ја криел својата љубов кон американската култура и НБА лигата, па овој потег се смета за исполнување на неговата долгогодишна желба.
Орландо Сити подготвува нов „дрим-тим“
По заминувањето на легендите како Кака и Нани, Орландо Сити бараше ново заштитно лице за својот проект. Гризман доаѓа во момент кога клубот минува низ тежок период (13-то место на Истокот) и неодамна му врачи отказ на тренерот Оскар Пареха.
Со овој трансфер, МЛС лигата станува вистинско „собиралиште“ на светски ѕвезди. Гризман ќе им се придружи на Лионел Меси, Сон Хеунг-мин, Томас Милер, Хамес Родригез и неговиот поранешен репрезентативен колега Иго Лорис.
Последен танц со Атлетико
Иако договорот со Орландо е пред потпис, Гризман останува во Мадрид до крајот на јуни. Тој сака да си замине со трофеј, а шанса за тоа има во финалето на Копа дел Реј против Реал Сосиедад (18 април), како и во четвртфиналето на Лигата на шампионите против Барселона.
На 34 години, со над 200 гола за Атлетико и титула светски првак со Франција, Гризман е подготвен за новото поглавје наречено „Американски сон“.
