Американскиот Формула 1 тим, Хаас, направи вистински маркетиншки земјотрес пред трката за Големата награда на Јапонија. На спектакуларен настан во Токио, возачите Оли Берман и Естебан Окон го открија новиот, специјален изглед на болидот „VF-26“ инспириран од култниот јапонски филмски херој Годзила.
Болидот ги задржува традиционалните црвена, бела и црна боја, но сега на двете страни доминира моќната силуета на Годзила кој блуе оган, придружен со брендирани детали кои совршено се вклопуваат во агресивниот дизајн на тимот.
Taking on Tokyo for our livery unveiling 🗼🇯🇵#HaasF1 #F1 | @Godzilla_Toho pic.twitter.com/csSUmoWyWv
— TGR Haas F1 Team (@HaasF1Team) March 24, 2026
Од „случаен коментар“ до историско партнерство
Идејата зад овој спој дошла директно од сопственикот Џин Хаас. Директорот на тимот, Ајао Комацу, откри дека Хаас инсистирал на оваа врска, препознавајќи го Годзила како симбол на динамичност и деструктивна моќ, карактеристики со кои американскиот аутсајдер сака да се идентификува во Ф1.
„Годзила е икона во целиот свет. Тој е динамичен и малку деструктивен, токму како што сме и ние во овој спорт. Ова е совршен спој“, изјави Комацу по официјализирањето на соработката со јапонското студио „Toho“.
Хаас е најголемиот „нарушувач на мирот“ во 2026 година
Оваа соработка доаѓа во момент кога Хаас ја шокира Формула 1 елитата. По почетните трки, малиот американски тим се наоѓа на неверојатното четврто место кај конструкторите со 17 бода, само еден зад Мекларен и дури пет пред тимовите на Ред Бул.
Најголемото откритие на сезоната, младиот Оли Берман, кој ги освои сите поени за тимот и моментно е петти кај возачите (пред Макс Верстапен!), не го криеше задоволството:
„Ова е почеток од соништата. Автомобилот е брз и сигурен, а со засилувањето на врските со Тојота и сега ова со Годзила, покажуваме дека сериозно го напаѓаме јапонскиот пазар“, вели младиот Британец.
Спектакуларна турнеја: Од Сузука до Тексас
Партнерството со „Toho“ нема да заврши во Јапонија. Специјалната промоција ќе продолжи и на трката за Големата награда на САД во октомври, со цел да се промовира новиот филм „Godzilla Minus Zero“ кој излегува во ноември.
Дали „Кралот на монструмите“ ќе му донесе среќа на Берман да се искачи на подиумот среде Јапонија? Судејќи по досегашната форма на Хаас, сè е можно!
Consider the King of Monsters race-ready 🐉🏁 #HaasF1 #F1 | @F1 pic.twitter.com/eneiKAdjeo
— TGR Haas F1 Team (@HaasF1Team) March 24, 2026
