Кошарката повторно ќе биде празник. Кошаркарската федерација на Македонија (КФМ) денеска сподели одлична вест за љубителите на спортот, популарниот „All Star“ настан се враќа на голема врата и повторно станува дел од официјалниот календар.
Закажете го датумот: 21 декември (недела), 2025 година. Тогаш салите ќе ечат од атракции, забивања и мајстории, како што стои во официјалната информација до медиумите.
Три натпревари и „Македонија против Светот“
Програмата ќе биде богата и ќе содржи три натпревари кои ги покриваат сите сегменти на нашата кошарка:
- „Ѕвезди во подем“: Натпревар за македонските надежи (М20).
- Женски сениорски Ол-стар.
- Машки сениорски Ол-стар.
Најатрактивниот дел секако ќе биде форматот на сениорските натпревари. Публиката ќе ужива во дуелот на селекциите „Македонија“ против „Свет“. Најдобрите домашни играчи ќе ги одмерат силите со најквалитетните странски засилувања кои настапуваат во „МТЕЛ“ Супер лигата (мажи) и „Шпаркасе Лајф“ Првата лига (жени).
Забивања, тројки и награди
Ниту еден Ол-стар не е комплетен без индивидуалните атракции. Во паузите меѓу четвртините, гледачите ќе уживаат во натпревари во забивање и шутирање тројки, каде играчите ќе ја покажат својата креативност и прецизност.
Дополнително, настанот ќе има и свечен карактер. Ќе бидат доделени признанија за најдобрите поединци и колективи за сезоната 2024/25, оддавајќи почит за трудот и професионализмот на терените.
Кои играчи ќе настапат? Од КФМ најавуваат дека составите на екипите и стручните штабови ќе бидат објавени овој понеделник, 15 декември.
Следете нè: Facebook | Instagram | X
