Денвер Нагетс – Хјустон Рокетс 128:125 (по продолжение)
Во ноќ за кошаркарските љубители, Никола Јокиќ уште еднаш потврди зошто е срцето и умот на Денвер. Српскиот ас одигра натпревар за паметење со 39 поени, 15 скока и 10 асистенции за неговиот 12-ти трипл-дабл сезонава, со кој Нагетс ја преживеаја драмата против Хјустон.
Регуларниот дел донесе вистински ролеркостер од четири израмнувања и четири промени на водство во последните 100 секунди. Џамал Мареј со слободно фрлање на 2,3 секунди до крајот обезбеди продолжение, а потоа ја презеде сцената. Во продолжението уфрли шест од 11-те поени на Денвер и со ладна рака ја затвори петтата последователна победа.
Хјустон имаше своја приказна со Алперен Шенгун кој имаше трипл-дабл (33-10-10), но промашената тројка во финишот значеше крај на надежите.
Јута Џез – Далас Маверикс 140:133 (по продолжение)
Историјата беше испишана, но со горчлив вкус. Купер Флег стана најмладиот играч во историјата на НБА со над 40 постигнати поени на само 18 години. Уфрли 42, го израмни рекордот на Марк Агвире за новајлија во Далас, но Јута го имаше последниот збор.
Кијонте Џорџ (37) и Лаури Марканен (33) ја носеа Јута до победа, која направи 11:0 серија во финишот и целосно ја презеде контролата во продолжението. Флег беше херој, но и прв што призна дека „мора да бидам подобар кога најмногу се крши резултатот“.
Бостон Селтикс – Детроит Пистонс 105:112
Детроит продолжува да испраќа порака до Истокот дека ова веќе не е случајност. Кејд Канингем одигра зрел, лидерски натпревар со 32 поени и 10 скока, а Пистонс славеа во Бостон за четврта победа по ред.
Селтикс се обидоа да се вратат преку Џејлен Браун (34) и Дерик Вајт (31), но Детроит беше постабилен кога најмногу требаше. Канингем погоди два клучни шутеви во последните две минути и ја затвори вечерта.
Мајами Хит – Торонто Репторс 96:106
Торонто конечно здивна. Брендон Инграм блесна со 28 поени и пет тројки, а Репторс ја прекинаа серијата порази, оставајќи го Мајами во уште подлабока криза.
Скоти Барнс беше блиску до дабл-дабл, а Репторс погодија 16 тројки – премногу за Хит, кои повторно играа без Тајлер Хиро.
Мемфис Гризлис – ЛА Клиперс 121:103
Мемфис продолжи да доминира над Клиперс. Џерен Џексон Џуниор уфрли 31 поен, од кои 21 во првото полувреме, а младата енергија на Гризлис беше премногу за уморниот Лос Анџелес.
Клиперс го продолжија кошмарниот период од 12 порази во последните 14 натпревари, и повторно изгледаа без одговор на интензитетот на противникот.
