Њујорк Никс – Јута Џез (146 – 112)
На Мадисон Сквер Гарден се играше кошарка што повеќе наликуваше на холивудско сценарио отколку на НБА реалност. Њујорк поведе со неверојатни 23-0 во првите шест минути и го запиша најголемиот стартен налет во лигата уште од 1997 година. Џејлен Брансoн го заврши првиот налет со тројка и ја продолжи вечерта со 33 поени, додека Дјус Мекбрајд го запали паркeтот со седум тројки и 22 поени.
Никс ги вратија и ОГ Ануноби од повреда и доминацијата им беше толку убедлива што стартната петорка не мораше ни половина од ноќта да ја мине на терен. Јута немаше одговор, иако Лаури Марканен и Кејонт Џорџ се обидоа да го разубават резултатот со по 18 поени. Сепак, сите надежи за трета победа по ред исчезнаа уште во воведните минути.
Денвер Нагетс – Атланта Хокс (134 – 133)
Најголемиот пресврт на вечерта дојде од Денвер. Нагетс губеа со 23 разлика, но Никола Јокиќ повторно им го подари невозможното. Српскиот центар постигна 39 поени и го предводеше тимот до деветта последователна победа на гостински терен. Џамал Мари имаше клучен блок на Никил Александер-Вокер во последните секунди и го спречи можниот обид за израмнување.
Иако Атланта загуби, Јален Џонсон испиша историја со трипл-дабл уште на полувреме.
Хјустон Рокетс – Феникс Санс (117 – 98)
Историска вечер за Кевин Дјурант. Во Хјустон стана осмиот играч во историјата кој стигнал до 31.000 поени, а тоа го направи со стил, во својот прв дуел против поранешниот тим по големиот седумтимски трејд. Дјурант постигна 28 поени и Хјустон доминираше цела ноќ, иако тој не одигра ни минута во последниот период.
Најдобар на паркeтот беше Амен Томпсон со 31 поен, што беше негова најдобра партија сезонава. Рокетс заостануваа на почетокот на мечот, но потоа запалија со 44 поени во вториот период и ја контролираа играта до крај.
Бостон Селтикс – ЛА Лејкерс (126 – 105)
Во ТД Гарден се играше само во една насока. Ослабените Лејкерси без Леброн Џејмс и Лука Дончиќ не можеа да го следат ритамот на Бостон, кој уфрли 24 тројки и имаше 31 асистенција. Џејлен Браун го водеше тимот со 30 поени, а Дерик Вајт погоди пет тројки и заврши со 19.
Остин Ривс повторно ја презеде улогата на главен носител и даде 36 поени, но тоа не беше доволно за да се сопре најдобрата верзија на Бостон.
Орландо Меџик – Мајами Хит (106 – 105)
На Флорида се играше најтесниот натпревар на вечерта. Орландо преживеа благодарение на промашениот шут за победа од Бам Адебајо во последната секунда. Франц Вагнер блескаше со 32 поени, а Џејлен Сагс додаде 22. Паоло Банкеро се врати по пауза од десет натпревари и внесе дополнителна сигурност во нападот.
Мајами се обидуваше да го преземе ритамот со одличната партија на Норман Пауел, кој даде 28 поени, но во пресметката на детали, Меџик беа поконцентрирани.
Кливленд Кавалерс – Сан Антонио Спарс (130 – 117)
Кливленд запиша можеби најимпресивно трето полувреме сезонава. Од заостанување од десет поени стигнаа до комплетен пресврт, водени од 23-4 налет и неверојатни 44 поени во периодот. Донован Мичел уфрли 28, а Џејлон Тајсон блескаше со 24, од кои 16 во третиот период.
Девин Васел погоди седум тројки во првото полувреме, но Спарс не успеаја да одржат темпо со тимот што експлодираше во вториот дел.
Шарлот Хорнетс – Торонто Рапторс (111 – 86)
Шарлот ја прекина мини-серијата порази со сигурен настап во Канада. Кон Кнупел погоди пет тројки и даде 21 поен, а Ламело Бол беше кратко на паркетот пред да ја напушти играта поради болка во глуждот. Торонто немаше енергија по тесниот пораз од Лејкерс ден претходно и иако Имануел Квикли уфрли 31, недостасуваше колективен напор.
Мемфис Гризлис – ЛА Клиперс (107 – 98)
Мемфис продолжи со одличната форма и дојде до шеста победа во последните осум натпревари. Дебитантот Седрик Кауард забележа 23 поени и 14 скока, а тимот го следеше неговиот интензитет. Клиперси го имаа Каваи Ленард со 24 поени, но тимот падна во вториот дел и загуби по деветти пат во последните 11 дуели.
Филаделфија 76ерс – Милвоки Бакс (116 – 101)
Филаделфија одигра зрел натпревар и ја искористи шансата против Милвоки без Јанис. Квентин Грајмс беше изненадување на вечерта со 22 поени, а клупата на 76ерс уфрли 61 поен. Тајрис Мекси беше „задржан“ на 12 поени, но тимската игра беше водечка сила.
Бакси беа без својот лидер, а Еј Џеј Грин, кој ја напушти играта поради повреда на рамото. Портис даде 22, но тоа не го промени исходот.
Детроит Пистонс – Портланд Трејл Блејзерс (122 – 116)
Детроит направи силен пресврт пред својата публика. Кејд Канингем уфрли 13 од своите 29 поени во последната четвртина и го презеде натпреварот. Портланд имаше три играчи со над 28 поени, предводени од Дени Авдија со 35, но недостатокот на длабочина го пресуди мечот.
Индијана Пејсерс – Чикаго Булс (120 – 105)
Индијана потсети како изгледаше тимот што стигна до НБА финалето минатата сезона. Паскал Сијакам блескаше со 36 поени по нулти прв период и покажа лидерство. Бенедикт Матирин погоди шест тројки и заврши со 28, а Пејсерс конечно ја прекинаа ужасната гостинска серија и ја освоија првата победа надвор од дома сезонава.
Оклахома Сити Тандер – Далас Маверикс (132 – 111)
ОКС изгледа непобедливо. Тимот стигна до неверојатен скор од 22-1 со нова доминација и четиринаесетта победа по ред. Шеј Гилџиус-Александер постигна 33 поени за само три четвртини и продолжи со историската серија од 95 натпревари со најмалку 20 поени.
Далас остана без енергија, иако Џејден Харди се истакна со 23 поени, а чудото од драфтот Купер Флег даде 16.
