Лидерот во МотоГП шампионатот, Марко Бецеки, кој заработи шокантна суспензија од Големата награда на Чешка, го искористи неделното утро за да го поправи својот непромислен потег. Возачот на Априлија излезе на патеката во Брно со една единствена цел – лично да го најде и да му се извини на редарот кого физички го нападна по падот на саботната Спринт трка.
Телевизиските камери кои го пренесуваа утринското загревање го уловија овој емотивен момент. Бецеки долго и пријателски разговараше со редарот на патеката, искрено барајќи прошка за својот испад. Италијанецот му врачи и неколку подароци во знак на помирување, по што двајцата се прегрнаа неколку пати, покажувајќи дека конфликтот е целосно надминат.
The first thing Marco Bezzecchi did today was to apologize personally to the marshal 🤝
— MotoGP™🏁 (@MotoGP) June 21, 2026
A very emotional moment 🥹#CzechGP 🇨🇿 pic.twitter.com/QJfqAHTbJw
Јавно извинување: „Редарите се жртвуваат за нашата безбедност“
Иако му е забрането да учествува на неделната трка, Бецеки остана во гаражата на Априлија за да го следи загревањето, но претходно испрати и јавна порака преку своите профили на социјалните мрежи, каде изрази длабоко каење.
„Сакам да ѝ се извинам на целата МотоГП заедница за моето однесување кон редарот покрај патеката. Исто така, многу ми е жал бидејќи знам колку труд и жртва вложуваат маршалите за да ја осигураат нашата безбедност. Вакво однесување не смее да се случи и за него нема апсолутно никакво оправдување. Им се извинувам на сите, на тимот Априлија Рејсинг и на сите мои фанови“, напиша возачот со број 72.
Априлија ја прифати казната
По инцидентот во саботата, стјуардите на ФИМ експресно го суспендираа Бецеки од неделната трка. Тимот на Априлија веднаш поднесе жалба до Апелациониот суд, но истата беше одбиена, а казната потврдена.
Утрово пристигна и официјална потврда дека тимот се откажува од понатамошни жалбени постапки кон повисоките инстанци. Казната е целосно прифатена, што значи дека лидерот во генералниот пласман дефинитивно ќе ја пропушти Големата награда на Чешка, оставајќи простор за неговите конкуренти драстично да ја намалат бодовната разлика.
We caught up with Ladislav the Marshal to get his take on the situation with Marco Bezzecchi 🎤#MotoGP | #CzechGP pic.twitter.com/s66qHoJ9nB
— TNT Sports Bikes (@bikesontnt) June 21, 2026
