Европското првенство 2026 за Македонија е веќе архивирано. Со една победа, едно реми и еден пораз, четата на Кире Лазаров го освои 14-тото место во конечниот пласман. Иако можеби жалиме за пропуштената шанса против Португалија, овој пласман носи огромен бенефит, повластен статус во баражот за Светското првенство 2027 во Германија.
Напредокот од три позиции во однос на ЕП 2024 (кога бевме 17-ти) значи дека Македонија го скока претквалификацискиот бараж во март и директно влегува во финалната битка во мај, и тоа од позиција на носител.
Прв шешир: Зошто е ова важно?
Ждрепката е закажана за 31 јануари. Благодарение на пласманот во Топ 16 (без да се сметаат полуфиналистите и домаќините), Македонија се најде во Шеширот 1.
Ова значи дека во двомечот што ќе се игра во мај 2026 година (прв меч 13/14, реванш 16/17 мај), ќе ги избегнеме „аждертите“ како Франција, Хрватска, Шведска, Унгарија, Шпанија и Словенија (доколку некоја од нив не стане европски првак или финалист).
„Минско поле“ во вториот шешир: Кого сакаме, а кого не?
Иако сме носители, вториот шешир крие сериозни „мини“. Таму ќе се најдат победниците од мартовските дуели (Бараж 2), каде што има неколку репрезентации кои по секоја цена треба да се избегнат.
🔥 Опасни ривали (За избегнување):
- Србија (ако ја помине Литванија) – Балканско дерби е секогаш ризик.
- Полска (ако ја помине Летонија) – Полјаците се во подем.
- Црна Гора (ако ја помине Финска) – Незгоден и жилав противник.
- Чешка – Селекција која знае да изненади фаворити.
✅ Пожелни ривали:
- Италија – Иако напредуваат, сепак се скалило под нас.
- Грција или Белгија – Противници по мерка за сигурен пласман.
- Босна и Херцеговина – Имаат пад во квалитетот и внатрешни проблеми.
- Грузија или Израел – „Нагазна мина“, но сепак подобри опции од Србија или Полска.
Комплетна слика на Баражот
Еве како изгледа распоредот на квалификациите:
- БАРАЖ 2 (Март 2026): Играат победниците од претквалификациите против послабо рангираните од ЕП (19-24 место). Најинтересни дуели се Србија – Литванија и Финска – Црна Гора.
- БАРАЖ 3 (Мај 2026): Тука влегува Македонија. Победниците од овие двомечи патуваат директно на Мундијалот во Германија.
Заклучок: Лазаров и ракометарите ја завршија првата задача, обезбедија полесен пат до СП. Сега останува среќата да биде на наша страна на 31 јануари и да ни додели противник преку кој „Фалангата“ ќе може да резервира билети за Келн, Минхен или Хановер.
