Ракометната федерација на Македонија (РФМ) официјално ја претстави својата прва маскота во историјата – симпатичното куче Шарко! Ова моќно шарпланинско куче, кое го симболизира македонскиот борбен дух, лојалност и гордост, отсега па натаму ќе биде заштитен знак на секоја наша ракометна приказна, голема победа и навивачки моменти на трибините.
Шарко својата прва официјална средба со фановите ја има токму денеска, како дел од големиот ракометен фестивал што се одржува во главниот град.
Целодневна фан-зона и ракометен празник пред СЦ „Борис Трајковски“
Претставувањето на Шарко е само дел од богатата програма со која РФМ за првпат во нашата држава го организира и одбележува „Националниот ден на ракометот“. На платото пред Спортскиот центар „Борис Трајковски“, забавата е веќе во полн ек и започна уште во 13:00 часот со специјално организирана фан-зона за сите генерации.
Сите посетители, а особено најмладите, имаат прилика први да се запознаат и да се фотографираат со Шарко, но и да уживаат во:
- Мини ракометен турнир на отворено каде се калат новите ракометни надежи.
- Многу музика, забава и изненадувања со кои се загрева атмосферата.
- Подароци и реквизити наменети за најверните навивачи.
Оваа фан-зона е совршена увертира и покана за сите искрени љубители на спортот заеднички да ја кренат навивачката енергија пред она најважното што следува вечерва.
Круна на денот: Македонија оди по мундијалски билет против Словачка!
Целиот овој ракометен празник е насочен кон поддршка на нашата машка сениорска репрезентација. Вечерва, со почеток во 19:00 часот, Македонија го игра исклучително важниот квалификациски натпревар за пласман на Светското првенство во 2027 година против селекцијата на Словачка.
Нашите момци се подготвени да го остават срцето на теренот, но за нов голем мундијалски успех, неопходен е „осмиот играч“ – фанатичната поддршка од преполните трибини во салата.
Доколку сè уште немате обезбедено место, билетите се во продажба по цена достапна за секого и можат да се набават онлајн преку продажните мрежи на MKTickets и Karti.com.mk.
Облечете ги црвено-жолтите дресови, дојдете пред „Борис Трајковски“, запознајте го Шарко и со моќно навивање да ги водиме нашите ракометари до нова голема победа! Се гледаме во фан-зоната!
