По 14 натпревари пауза поради ишијас, Леброн Џејмс конечно се врати на паркетот и стана првиот играч во историјата кој настапил во 23 последователни сезони. Во неговото долгоочекувано деби за сезоната, Лејкерси стигнаа до триумф од 140-126 над Јута, во меч кој донесе старо-нов енергичен „потпис“ на кралот.
Лука Дончиќ блесна со 37 поени и 10 асистенции, додека Леброн одигра 30 минути и заврши со 11 поени. Остин Ривс додаде 26, а Деандре Ејтон запиша моќни 20 поени и 14 скока, доволно за трет последователен триумф на ЛА.
Кај Јута, фантастични партии одиграа Кијонт Џорџ со 34 поени и Лаури Марканен со 31, но без резултат – ова е петти пораз за Џез во последните седум натпревари.
Орландо го „казни“ уморниот Голден Стејт
Меџик 121, Вориорс 113
Дезмонд Бејн беше најдобар стрелец за Орландо со 23 поени, а Ентони Блек од клупа внесе 21 и целосно ја смени динамиката на натпреварот. Франц Вагнер постигна 18, а Вендeл Картер Џуниор заврши со дабл-дабл од 17 поени и 12 скока.
Стеф Кари пак уфрли 34 поени, но уморот од пет гостувања во осум дена си го направи своето – Вориорси повторно паднаа на пат.
Детроит во победничко расположене: Единаесетта победа по ред
Пистонс 120, Хокс 112
Кејд Канингем се врати по три натпревари пауза и веднаш запиша 25 поени, 10 асистенции и 6 скока. Пистонси ја продолжија неверојатната серија и стигнаа до 11-та победа по ред, првпат по сезоната 2007/08.
Јален Дурен додаде 24 поени и 8 скока, додека Атланта ја прекина својата серија од пет победи.
Спарси без Венбанјама, но со срце – Мемфис падна
Спарс 111, Гризлис 101
Без Вембанјама и Стефон Касл, но со огромна борбеност, Сан Антонио го совлада Мемфис. Д’Арон Фокс беше прв стрелец со 26 поени, Харисон Барнс додаде 23 и седум последователни поени во клучниот момент.
Кај Гризлис, Седрик Кауард постигна 19 поени и 11 скока, но тоа не беше доволно – Мемфис е во слободен пад со пет порази по ред.
Бостон со трета победа во низа – Браун доминира во второто полувреме
Селтикс 113, Нетс 99
Џејлен Браун уфрли 23 од своите 29 поени во вториот дел и ги водеше Селтикс до трета последователна победа. Пејтон Причард додаде 22, а Дерик Вајт 15.
Бруклин останува 0-7 дома, иако Мајкл Портер Џуниор беше најдобар со 25 поени.
Феникс „прошета“ низ Портланд
Санс 127, Трејл Блејзерс 110
Девин Букер одигра само три четвртини, но успеа да запише 19 поени, 5 асистенции и 3 украдени топки. Резервистот Колин Гилеспи шокираше со 19 поени и четири тројки.
Кај Портланд, Шејдон Шарп беше расположен со 29 поени, но тоа беше само козметика во новиот пад на Блејзерси, трети по ред.
