Додека Македонија се подготвува за новиот мундијалски предизвик против Данска, денешниот датум буди спомени кои сè уште предизвикуваат морници кај секој Македонец. На денешен ден, 24 март 2022 година, македонската фудбалска репрезентација ја приреди една од најголемите сензации во историјата на фудбалот, елиминирајќи го актуелниот европски шампион Италија среде Палермо.
Проектилот на Трајковски кој влезе во легендите
Се играше 92-та минута на стадионот „Ренцо Барбера“. Италијанците напаѓаа со сите сили, но македонскиот бедем беше нескршлив. А тогаш, се случи магијата. Александар Трајковски ја прими топката на средината на теренот, напредуваше неколку метри и со прецизен „проектил“ од околу 25 метри го совлада Џанлуиџи Донарума.
Тоа беше моментот кога времето застана, а Македонија испиша историја. Со тој гол, „рисовите“ го чекираа билетот за финалето на баражот, а Италија по вторпат по ред остана без Светско првенство.
Мотив плус за Копенхаген
Денеска, четири години подоцна, Трајковски е повторно тука, со истата желба и истата верба. Ова потсетување на „чудото од Палермо“ доаѓа во вистински момент за да ни покаже дека за оваа генерација на Македонија ништо не е невозможно – дури ни победа на жешкиот терен во Данска.
