Каква ноќ во најсилната кошаркарска лига! Додека Оклахома покажува зошто е најдобра екипа во моментов, Никола Јокиќ и Стеф Кари приредија индивидуални мастеркласи кои долго ќе се паметат.
Шоу на Јокиќ во Л.А.: 55 поени за шеста победа по ред!
Никола Јокиќ едноставно си играше кошарка со Клиперси. Српскиот центар постигна неверојатни 55 поени (изедначувајќи го рекордот на сезоната), додаде 12 скока и шутираше фантастични 18/23 од игра во победата на Денвер од 130-116.
Ова беше шеста победа по ред за Нагетс, додека Клиперси, кои дознаа дека Бредли Бил ја заврши сезоната поради скршеница на колкот, беа немоќни и покрај 23-те поени на Харден.
„Старецот“ Кари му одржа лекција на Вембањама
Во Сан Антонио, Стеф Кари покажа дека сè уште е елита. „Снајперот“ на Вориорс постигна 46 поени (29 во второто полувреме) и го водеше Голден Стејт до победа од 125-120.
Ова беше доволно да се засени историската ноќ на Спарс, каде Виктор Вембањама (31 поен, 14 скока, 10 асистенции) и Стефон Касл (23/10/10) станаа првите соиграчи во историјата на клубот со трипл-дабл на ист натпревар.
Тандер се застрашувачки – Дончиќ „уапсен“ во Оклахома
Дербито на Западот се претвори во егзекуција. Оклахома Сити Тандер го прегази Лос Анџелес Лејкерс со 121-92 и стигна до скор од 12-1.
Шеј Гилџус-Александер постигна 30 поени за само три четвртини, додека Лука Дончиќ беше сведен на само 19 поени со слаб шут од 7/20.
Останати резултати:
- Орландо – Њујорк 124-107: Меџик им го нанесоа првиот домашен пораз на Никс. Франц Вагнер блескаше со 28 поени, додека ѕвездата на Орландо, Паоло Банкеро, се повреди.
- Мајами – Кливленд 116-130: Иако без Мичел, Гарланд и Мобли, Кавс славеа на Флорида благодарение на Џерет Ален (30 поени, 10 скока).
- Бостон – Мемфис 131-95: Пејтон Причард (24 поени) и Селтикс немаа милост за Гризлис кои играа без Џа Морант.
- Њу Орлеанс – Портланд 117-125: Шејдон Шарп (35 поени) и Дени Авдија (32 поени) ги водеа Блејзерс до голема победа на гости.
- Хјустон – Вашингтон 135-112: Кевин Дурант (23 поени) и Ракетите лесно се справија со Визардс, кои го запишаа 10-тиот пораз по ред.
- Шарлот – Милвоки 111-100: Без Јанис Адетокумбо, Бакс беа лесен плен за Хорнетс и Мајлс Бриџис (20 поени).
- Далас – Феникс 114-123: Санс, предводени од Букер (26 поени), ја продлабочија кризата на Мавс, кои го имаат најлошиот старт од 2017 година.
- Сакраменто – Атланта 100-133: Џејлен Џонсон (24 поени, 10 скока) ги предводеше Хокс до убедлив триумф над „Кралевите“.
Следете нè: Facebook | Instagram | X
