Македонската кошарка има нова ѕвезда на европското небо. Андреј Јакимовски, репрезентативецот на Македонија и член на италијанскиот Тренто, одигра натпревар кој долго ќе се памети и сосема заслужено го понесе признанието за МВП на 10. коло во БКТ Еврокупот.
24-годишниот крилен кошаркар не само што беше најдобар на теренот, туку испиша и историја за својот клуб.
Индекс 43 – Рекорд во историјата на Тренто
Јакимовски беше незапирлив во големата гостинска победа на Тренто против францускиот Бург (91-73). Тој го заврши мечот со импресивен индекс на корисност (PIR) од 43 – што е највисок индекс некогаш забележан од играч на Тренто во ова натпреварување.
Со ова, тој стана само петтиот играч во историјата на италијанскиот клуб кој го освоил ова признание, приклучувајќи им се на имиња како Доминик Сатон и Алесандро Џентиле.
Статистика „за во рамка“
Бројките на Јакимовски од синоќешната вечер изгледаат застрашувачки за секоја одбрана:
- Поени: 30 (најдобар стрелец во колото)
- Шут за 2: 8/10
- Шут за 3: 2/5
- Слободни фрлања: 8/9
- Скокови: 7
- Изнудени фаули: 10.
Неговата доминација беше клучна Тренто да стигне до својата петта победа во групата Б, со што тимот се искачи на скор од 5-5.
Во друштво на најдобрите
Зад себе, Јакимовски ги остави Мајкл Флауерс од Лиеткабелис (индекс 35) и Брајс Џонс од Арис (индекс 33). Ова е првпат во неговата кариера да биде прогласен за најкорисен играч на колото во едно од најсилните европски натпреварувања.
Ова е огромно охрабрување и за македонската репрезентација, која во Јакимовски добива лидер подготвен за големи дела на меѓународната сцена.
Следете нè: Facebook | Instagram | X
