Анализа на Горан Талевски
Македонската ракометна репрезентација успешно ја отвори подготвителната фаза за претстојното Европско првенство, запишувајќи триумф на првиот тест во Винтертур. Во рамките на „Жолтиот куп”, избраниците на Лазаров, иако низ игра со доста осцилации, покажаа карактер во решавачките моменти и славеа над Бахреин со 32-28.
Ова е прва радост за нашите ракометари во пресрет на континенталниот собир во Скандинавија, натпревар во кој клучната разлика ја направија расположените голмани и капитенското издание на Кузмановски во второто полувреме.
Цврста одбрана, но без идеја во нападот
Натпреварот започна со тврда игра и силни одбрани на двете страни. Бахреин наметна агресивен дефанзивен стил кој им создаде сериозни проблеми на нашите ракометари во организацијата на нападот. Македонија тешко доаѓаше до изгледни шанси и секој гол беше резултат на макотрпна работа, често потпирајќи се на индивидуални решенија и игра „еден на еден”.
Сепак, она што недостасуваше во нападот, се компензираше со дисциплина во одбраната. Противникот правеше грешки, додека нашиот тим беше речиси безгрешен во тој сегмент. Дури и во моментите со играч помалку (околу 17-та минута), Македонија успеа да ја задржи позитивата, а играта со играч повеќе резултираше со два гола во наша корист без примен погодок.
Капитенот Филип Кузмановски имаше бавен старт, постигнувајќи го својот прв гол дури во 20-тата минута, но одбраната функционираше беспрекорно, држејќи го Бахреин на дистанца. Пред самиот крај на полувремето, преку неколку брзи полуконтри, Македонија имаше шанса да се одлепи на „плус пет”, но по неколку промашени зицери и технички грешки, дозволивме Бахреин да намали на пристојни 15-13 на паузата.
Пад во формата, па капитенски финиш
Второто полувреме донесе „млитав” старт за Македонија. Слабата игра на двата краја на теренот резултираше со пресврт, па во 40-тата минута Бахреин за првпат поведе. Следуваше период на брзање и неквалитетна игра, но нашите ракометари успеаја навреме да се консолидираат и да го вратат егалот.
Клучниот момент се случи по 50-тата минута. Македонија ја „стегна” одбраната, а Бахреин физички падна и не можеше да го следи наметнатото темпо. Агресивноста во дефанзивата донесе лесни голови од транзиција, со што разликата повторно се искачи на недостижни пет гола (29-24).
Хероите на денот: Голманите и капитенот
Ако треба да се издвојат поединци, тоа дефинитивно се чуварите на мрежата. Никола Митревски блескаше во првиот дел со 9 интервенции, додека Мартин Томовски го заврши мечот со 7 одбрани, вклучувајќи и еден седмерец.
Во нападот, „моторот” беше Филип Кузмановски. Иако во првиот дел постигна само еден гол, во второто полувреме експлодираше и мечот го заврши со 9 погодоци од 11 обиди, преземајќи ја одговорноста кога беше најпотребно. Одлична поддршка дадоа Велковски, Џонов и Костески, кои постигнаа по 5 гола.
Брусење на формата без притисок
Генералниот впечаток е дека Македонија знаеше да „запне” кога се кршеше резултатот. Иако имаше промашени зицери и периоди без идеја во нападот, победата е важна за самодовербата. Овие натпревари служат пред сè за воигрување и „брусење” на формата, па резултатот, иако позитивен, останува во втор план. На тимот му е потребна поддршка и трпение во овој процес.
Следниот предизвик за Македонија е веќе денес против селекцијата на Украина, а турнирот ќе го затвориме со дуел против домаќинот Швајцарија ден подоцна.
