Јаник Синер ја започна одбраната на својата титула на АТП Финалето во Торино токму онака како што посакуваше домашната публика, со сигурна победа од 7-5, 6-1 против Канаѓанецот Феликс Оже-Алијасим.
Дуелот траеше еден час и 40 минути, а Италијанецот делуваше стабилно и концентрирано од почеток до крај. Синер одигра речиси совршен меч: освои 89% од поените на првиот сервис (32 од 36), не дозволи ниту една брејк топка и реализира три брејка од десет обиди. Првиот сет беше израмнет, но при резултат 6-5 за Италијанецот, Оже-Алијасим почувствува проблем со левата нога, по што неговиот отпор се стопи. Канадскиот ас доби две медицински паузи, но очигледно не можеше да го следи ритамот на домашниот фаворит.
„Беше тешко сè до 6-5, а потоа тој почувствува физички проблем. Секогаш е тешко кога тоа ќе се случи, но мораш да останеш фокусиран“, изјави Синер по мечот.
Sealed with an ace 🎯@janniksin | #NittoATPFinals pic.twitter.com/ygrAlVgb01
— ATP Tour (@atptour) November 10, 2025
Ова е четврта победа на Синер над Феликс оваа сезона, по триумфите на полуфиналето на УС Опен и финалето на Мастерсот во Париз. Со оваа победа, Синер и Александер Зверев ја предводат „Бјорн Борг“ групата со по еден триумф.
Италијанецот сè уште е во игра и за пласман како број 1 на крајот на сезоната, но за тоа ќе мора да ја освои титулата, а Карлос Алкараз да не стигне до финале. Иако тој накратко пак се најде на првата позиција, Шпанецот се врати на врвот откако беа избришани резултатите од минатогодишниот финален АТП турнир на стартот на овој.
„Имам многу тешка група, сите сервираат силно, затоа мораш да останеш целосно фокусиран. Ако изгубиш еден брејк, тешко се враќаш“, додаде Синер.
Фриц моќен на стартот, Музети немоќен по доцното пристигнување
Покрај домашната победа на Синер, Тејлор Фриц го започна својот настап во „Џими Конорс“ групата со рутинска победа од 6-3, 6-4 против Лоренцо Музети.
Американецот, финалист од минатата сезона, беше прецизен и агресивен. Го контролираше мечот со својот сервис и форхенд и не дозволи Италијанецот да ја почувствува поддршката од трибините.
Музети беше доцен додаток во турнирот, повикан по повлекувањето на Новак Ѓоковиќ. Тој пристигна во Торино само еден ден пред мечот, директно по финалето во Атина, и тоа очигледно се одрази на неговата свежина.
In complete control 🕹️
— ATP Tour (@atptour) November 10, 2025
Last year's runner-up @Taylor_Fritz97 defeats Musetti in straight sets to get his campaign off to a great start.#NittoATPFinals pic.twitter.com/3KXHohh1iN
„Не можев да бидам на 100%, но сум горд што сум овде. Да играм на домашен терен на ваков турнир е чест“, изјави Музети.
Фриц, пак, ја гледа оваа победа како клучен чекор: „Ова беше важен меч ако сакам да се пласирам понатаму. Тој игра поинаку, со многу сечени удари, па ми требаше време да се прилагодам. Откако го најдов ритамот, чувствував дека сум на вистински пат“.
Со ова, Фриц и Алкараз ја предводат групата, додека Де Минаур и Музети заостануваат со порази.
Следете нè: Facebook | Instagram | X
