Македонската ракометна репрезентација со победа го отвори „Жолтиот куп“ во Швајцарија, но селекторот Кирил Лазаров не дозволува еуфорија. Иако нашите ракометари славеа над Бахреин, предводникот на „црвено-жолтите“ упати критика до своите избраници, потенцирајќи дека квалитетот на играта не бил на посакуваното рамниште.
Лазаров е свесен дека на Европското првенство секоја грешка се казнува, па затоа бара многу повеќе фокус и прецизност во претстојните мечеви.
„Задоволен од триумфот, не и од прикажаното“
Селекторот јасно стави до знаење дека овој турнир е последната филтрација пред големиот предизвик во Скандинавија.
„Задоволни сме што сме дел од овој силен турнир кој е одлична подготовка за Европското првенство. Победивме силна репрезентација, но морам да признаам дека не сум задоволен од играта. Се надевам дека на наредните два натпревари ќе изгледаме многу подобро на теренот. Полека мораме да ја подигнуваме формата за она што не очекува“, изјави Лазаров.
За Данска: Против најдобрите нема што да се загуби
Македонија го отвора Европското првенство против светскиот гигант Данска, натпревар кој Лазаров го гледа како огромен предизвик, но без притисок од резултатот.
„Колку и да се подготвувате за Данска, тоа никогаш не е доволно. Многу посилни репрезентации од нас губеле со двоцифрена разлика од нив. Тие се најдобрите во светот во изминатите години. Ние нема што да изгубиме, ќе се бориме спортски, но мора да признаеме дека тие се апсолутни фаворити“, додаде селекторот.
Следната станица за поправен испит е денешниот дуел против Украина (17:45 ч.), каде се очекува Лазаров да направи корекции во одбраната и транзицијата.
