Француската ракометна легенда, Лука Карабатиќ, зборуваше за својот соиграч од ПСЖ, Матео Мараш, но и за балканската атмосфера во тимот, присетувајќи се на епскиот пораз од „Каубоите“.
Францускиот ракометар, Лука Карабатиќ, неодамна даде опширно интервју за РТЛ, во кое откри интересни моменти од својата богата кариера. Сепак, посебен акцент стави на својот соиграч од Париз Сен Жермен, хрватскиот репрезентативец Матео Мараш.
Искусниот Карабатиќ не штедеше зборови за младиот десен бек, предвидувајќи му блескава кариера.
„Навистина ми беше задоволство кога видов дека Матео потпиша за Париз. Ние многу добро знаеме каков играч е тој и каков голем потенцијал поседува. Едноставно, тој може да стане еден од најдобрите десни бекови во светот“, истакна Карабатиќ.
Носталгија по балканската врска
Карабатиќ, кој има и српско потекло, се осврна и на промените во составот на ПСЖ низ годините.
„Секогаш сме имале играчи од Балканот, секогаш се зборуваше хрватски, српски… Во последниве години нема многу такви. Сега имаме повеќе Данци и Швеѓани. Затоа е добро што јас сум тука, па можеме малку да си поразговараме на ‘нашки’ со Мараш“, додаде легендарниот ракометар.
Залезот на кариерата: Уште една сезона?
Иако е на залезот на својата импресивна кариера, 37-годишниот ветеран не планира сѐ уште да ги закачи патиките на клин.
„Можеби ќе одиграм уште една сезона. Немам веќе што да докажувам, но тука сум и се трудам да уживам што е можно повеќе. И ако на клубот му треба дополнителна помош, јас сум тука“, ја најави Карабатиќ можеби последната сезона во професионалниот ракомет.
„Најлудата атмосфера“ против Хрватска
На крајот, се присети и на епскиот, но болен пораз од Хрватска на последното Светско првенство.
„Никогаш не заборавам пораз, а такви порази уште помалку. Но, кога гледам наназад, една година подоцна, тоа сепак беше убаво искуство. Иако загубивме, мислам дека тоа беше најлудата атмосфера што некогаш сум ја доживеал. Навистина беше нешто посебно“, заклучи Карабатиќ.
Гостинска статија на Марија Петровска
Следете нè: Facebook | Instagram | X
