Во Формула 1 светот, едно прашање доминира: кој е најдобриот возач на гридот? Според нас во Спортска Станица, одговорот е јасен: Макс Верстапен е класа за себе, возач кој веќе сега може да се смести меѓу најголемите во историјата.
Но, прашањето кое предизвикува многу повеќе дебата е, кој е “најдобар од останатите”? По импресивната сезона и победата во Сингапур, сè повеќе се зборува за возачот на Мерцедес, Џорџ Расел.
Од “преголема желба” до лидер на тимот
По заминувањето на Луис Хамилтон, сите очи беа вперени во Расел. Дали тој може да ја пополни празнината и да го води тимот? Одговорот, барем засега, е апсолутно да. Со две победи оваа сезона, 15 пласмани во топ 5 и освоени 73% од поените на Мерцедес, Расел докажа дека е вистински лидер.
Но, патот до тука не беше лесен. Самиот тој признава дека во минатото имал една голема маана.
“Пред неколку години, веројатно возев премногу напнато и се обидував да извлечам максимум и тогаш кога не требаше”, изјави Расел за “The Race”. “Сега, се чувствувам многу порелаксирано.”
Оваа „преголема желба“ во минатото го чинеше неколку грешки, како излетувањето во Канада или судирот во Сингапур минатата година. Но, оваа сезона, тие грешки ги нема. “Го видовме тоа кај Џорџ во минатото, но… не и во последно време. Тоа е чекорот напред што го направи оваа година”, изјави тимскиот шеф, Тото Волф.
Подобар од Хамилтон, подготвен за титула?
Иако многумина сè уште го критикуваат неговиот карактер, нарекувајќи го “плачко” и не толку допадлив како другите британски возачи, неговите возачки способности се неспорни.
“Импресивно е како го победи Хамилтон во две од трите сезони што ги возеа заедно”, “Дајте му добар болид и тој има сè што е потребно да стане светски шампион”, се дел од коментарите.
Самиот Расел е полн со самодоверба
“Се чувствувам како комплетен возач, многу поразличен од пред неколку години. Веќе некое време велам, подготвен сум да се борам за титула. Подготвен сум да го направам следниот чекор”, вели тој.
На крајот, дали Расел е навистина “најдобар од останатите”? Можеби е рано да се каже. Но, едно е сигурно: тој созреа, ги надмина своите слабости и стана вистински лидер. Сега, останува само Мерцедес да му даде болид со кој ќе може да го предизвика Макс Верстапен.
