Ема Радукану го заврши настапот на Вухан Опен уште во првото коло, откако беше приморана да се повлече од мечот против Американката Ан Ли по проверка на крвниот притисок во средината на вториот сет.
Британската тенисерка изгледаше видно исцрпена од самиот почеток. По медицинскиот тајм-аут и заостанувањето од 6-1, 4-1, таа реши да не продолжи. Сцената беше повеќе од разбирлива, температурата во Вухан достигнуваше 32°C, со влажност на воздухот блиску до 70 проценти. Еден ден порано, Радукану на социјалните мрежи сподели фотографија од временска апликација која покажуваше дека “чувството” надвор било еквивалентно на 37°C.
Организаторите на турнирот веќе претходно беа принудени да ја прекинат играта на неколку терени поради екстремната топлина, а главниот терен беше делумно затворен за да обезбеди сенка. Дури и со овие мерки, условите останаа неподносливи.
Emma Raducanu retires ill at Wuhan Open after having blood pressure and pulse checked
The 22-year-old looked out of sorts and required a medical time out at 6-1 4-1 down, before eventually calling a premature end to the match.
Read more 👇https://t.co/Qxh3y8RsyJ pic.twitter.com/hKhdlVcuL4
— Telegraph Sport (@TelegraphSport) October 7, 2025
Според правилото за екстремна жештина на ВТА, доколку температурата измерена со WBGT (која ја комбинира топлината, влажноста, сончевата изложеност и ветерот) ја надмине границата од 30°C, играчите имаат право на 10-минутна пауза по вториот сет. Но дури ни тоа не ѝ помогна на Радукану, која очигледно се бореше со физичка слабост и пад на притисокот.
Слична слика имаше и на Шангај Мастерс, каде што високите температури веќе земаат данок. Светскиот број 2, Јаник Синер, се повлече поради силни грчеви во ногата, Тејлор Фриц и Џовани Перикар едвај се движеа, а Новак Ѓоковиќ дури и поврати на теренот, опишувајќи ги условите како “брутални”.
Радукану е пријавена за настап на ВТА 500 турнирот во Нингбо следната недела, но сè повеќе изгледа дека би можела да ја заврши сезоната предвреме. Со тековниот пласман на 30-то место, таа би била меѓу носителите на Австралија Опен во јануари, доколку до тогаш ја врати свежината и формата што ја направија едно од највозбудливите имиња во женскиот тенис.
